कास्कीका तीनै क्षेत्रमा चुनिए सभापति

पोखरा – नेपाली कांग्रेस कास्कीको क्षेत्रीय अधिवेशनमा मिश्रित नतिजा आएको छ । प्यानल बनाएर उम्मेदवारी दिए पनि नतिजा भने प्यानलमा आएन । क्षेत्र नम्बर १ को सभापतिमा राजेन्द्रमणी लामिछाने भारी मत सहित विजयी भएका छन् ।

निकटतम प्रतिस्पर्धी बुद्धिमान गुरुङलाई १२८ मतको फराकिलो अन्तरले पराजित गरेका हुन् । लामिछानेले ४५८ मत पाए भने गुरुङको ३३० मत छ । लामिछाने जिल्लासभापति कृष्ण केसी गुटका हुन् भने गुरुङ पूर्व सभापति यज्ञबहादुर थापाको टिमबाट चुनाव लडेका थिए ।

समितिको सचिवमा सरोज केसी र ओम प्रकाश गुरुङ विजयी भएका छन् । सहसचिवमा सुजता गुरुङ र मोती गिरी विजयी भए । सहसचिव गिरी थापा प्यानलमा थिए ।

क्षेत्र नम्बर २ को सभापतिमा केशरप्रसाद निर्दोषी निर्वाचित भएका छन् । उनले निकटतम प्रतिस्पर्धी पुण्डरीप्रसाद बरालाई १७ मतान्तरले हराएका हुन् । निर्देषीले २४७ मत पाए भने बरालले २३० मत ल्याए ।

निर्दोषी जिल्लामा देवराज चालिसे गुटका हुन् भने बराल शुक्रराज शर्मा प्यानलमा थिए । सचिवमा देवकृष्ण पराजुली र नरेन्द्र अधिकारी विजयी भएका छन् भने सहसचिवमा भावना श्रेष्ठ र विश्वराज आचार्य विजयी भए । सचिव पराजुली र सहसचिव श्रेष्ठ निर्दोषी भन्दा फरक प्यानलबाट आएका हुन् ।

क्षेत्र नम्बर ३ को सभापतिमा मनोज गुरुङ निर्वाचित भए । देउवा निकट उनी ३८३ मत सहित विजयी हुँदा निकटतम प्रतिस्पर्धी खिमलाल बास्तोला ३१७ मत ल्याए । सचिवमा मेखबहादुर तामाङ र लक्ष्मीप्रसाद पौडेल विजयी भएका छन् । सहसचिवमा शीतल अधिकारी र आइन्दल गुरुङ निर्वाचित भएका छन् ।