माओवादी नेता पुन उपचारका लागि थाइल्याण्ड प्रस्थान

काठमाडौँ- बुधबार बिहान थप उपचारका लागि नेकपा (माओवादी केन्द्र)का स्थायी समिति सदस्य वर्षमान पुन थाइल्यान्ड गएका छन् । उनी पत्नी तथा पूर्वसभामुख ओनसरी घर्तीका साथ बैंकक प्रस्थान गरेका हुन् ।

लामो समयदेखि कमलपित्त (जन्डिस)बाट पीडित नेता पुनको स्वास्थ्यमा पछिल्ला केही दिनदेखि समस्या देखिएको हो । पुनलाई कमलपित्तको मात्रा बढेको, बान्ता हुने र ज्वरो आउनेजस्ता समस्या देखिएपछि ललितपुरस्थित सुमेरु अस्पतालमा उपचार गरिएको थियो ।

पुनका स्वकीय सचिव सन्तोष पुनले माओवादी अध्यक्ष पुष्पकमल दाहाल ‘प्रचण्ड’लगायत नेताहरूको सल्लाहमा उपचारको लागि थाइल्यान्ड लगिएको बताएका छन् । नेता पुनलाई थाइल्यान्डको बुम्रुङग्राड अस्पतालमा उपचार गराउने तयारी गरिएको उनले जानकारी दिएका छन् ।