कांग्रेसको बाँकी पालिकास्तरका अधिवेशन आज पनि हुँदै

काठमाडौँ- आज पनि नेपाली कांग्रेसको १४ औँ महाधिवेशन प्रक्रिया अन्तरगत विभिन्न जिल्लामा पालिकास्तरको अधिवेशन हुँदैछ ।

वडा तहको अधिवेशन सम्पन्न भएका ६४ मध्ये हिजो ५५ जिल्लामा पालिका तहको अधिवेशन सम्पन्न भएको छ । केन्द्रीय निर्वाचन समितिका सदस्य गोपालकृष्ण घिमिरेले त्यसमा बाँकी रहेकामध्ये केही जिल्लामा क्रमैसँग आजदेखि अधिवेशन हुने जानकारी दिएका छन् । साथै पछिल्लो पटक क्रियाशील विवाद टुंगिएका कतिपय जिल्लामा पनि आजै वडा अधिवेशन हुने केन्द्रीय निर्वाचन समितिले जनाएको छ ।

वडा अधिवेशन भइसकेका जुम्ला, नवलपुर, गुल्मी, बर्दिया, ललितपुर, काठमाडौं, मोरङ, सोलुखु्म्बु र सिन्धुपाल्चोक लगायतका जिल्लामा हिजो पालिका तहको अधिवेशन सम्पन्न हुन सकेको थिएन ।

काठमाडौं जिल्लाको अधिवेशन आगामी १६ गतेको लागि तय गरिएको छ । यसैबीच कांग्रेसले हिजो सुर्खेत, डोल्पा, बाँके, महोत्तरी र सिरहा गरी पाँच वटा जिल्लाका क्रियाशील सदस्यताको सूची सार्वजनिक गरेको छ ।