एमालेले आज पनि संसद बैठक अवरोध गर्ने

काठमाडौँ- प्रमुख प्रतिपक्षी दल नेकपा एमालेले आज पनि संसद बैठक अवरोधलाई निरन्तरता दिने भएको छ । सभामुख अग्निप्रसाद सापकोटाको भूमिकालाई लिएर एमाले भदौ २३ गतेदेखि निरन्तर संसद बैठक अवरोध गर्दै आएको छ ।

एमालेले माधव नेपालसहित १४ सांसद पदमुक्त भएको सूचना टाँस गर्नुपर्ने या सूचना टाँस नगरे सभामुख सापकोटाले राजीनामा दिनुपर्ने भएको अडान कायमै राखेको प्रमुख सचेतक विशाल भट्टराईले बताएका छन् । सभामुखले आफूहरुको शर्त पूरा नगरेसम्म संसद बैठक चल्न नदिने उनको भनाइ छ ।

सभामुखले संवादबाट विवाद समाधान गर्नका लागि सोमबार सर्वदलीय बैठक बोलाएका थिए । तर, एमालेले बहिष्कार गरेपछि एमालेसहितको बैठक राख्नुपर्ने निष्कर्षसहित बैठक टुंगिएको थियो ।