बाढी पहिरो प्रभावित क्षेत्रका सीडीओ र सशस्त्र प्रहरीका अधिकारीलाई गृहमन्त्रीको निर्देशन

काठमाडौँ- लगातार वर्षातका कारण गएको बाढी, पहिरो र डुवानबारे सम्बन्धित क्षेत्रका सशस्त्र प्रहरी बलका अधिकारी र प्रभावित चार जिल्लाका प्रमुख जिल्ला अधिकारीसँग गृहमन्त्री बालकृष्ण खाँणले शनिबार बिहान जानकारी लिएका छन् ।

प्रदेश–१, प्रदेश–२, बागमती, लुम्बिनी, कर्णाली र सुदूरपश्चिम प्रदेशका सशस्त्र प्रहरी बलका प्रमुख (डीआइजीपी)हरूसँग बाढी, पहिरो र डुवानबारे गृहमन्त्री खाणले जानकारी लिएका हुन् ।

गृहमन्त्री खाणले नवलपरासी पूर्वका प्रमुख जिल्ला अधिकारी माया भट्टराई पंगेनी, नवलपरासी पश्चिमका प्रमुख जिल्ला अधिकारी धर्मेन्द्रकुमार मिश्र, रुपन्देहीका प्रमुख जिल्ला अधिकारी आश्मान तामाङ र बाँकेका प्रमुख जिल्ला अधिकारी शिवराम गेलाललाई टेलिफोन गरी वर्षातपछिको अवस्थाबारे जानकारी लिएका हुन् ।

मन्त्री खाँणले अहिलेसम्मको कामको प्रशंशा गर्दै अझै वर्षात् जारी रहेकाले पूर्वतयारी पूर्णरुपमा गर्न निर्देशन दिएका छन् ।

मन्त्री खाँणले भने, “अहिलेसम्म तपाईंहरुले राहत, उद्धार र अस्थायी बसोबासको व्यवस्था गर्न गरेको काम सराहनीय छ । अब पूर्वतयारी पनि त्यो भन्दा राम्रो गतीशीलताका साथ गर्नुहोला।”

उनले मानिसको जीवन रक्षा र विपत्तिलाई सहजतामा ल्याउन उपलब्ध स्रोत र साधनको उपयोग गरी कुनै कसुर बाँकी नराख्नसमेत निर्देशन दिएका छन् ।