हामी सबै धेरथोर व्यक्तिवादी भएकै छौँ, आत्मसमीक्षा गरेर अगाडि बढौँ : प्रचण्ड

काठमाडौँ- व्यक्तिवादी सबैमा धेरथोर भएको नेकपा माओवादी केन्द्रका अध्यक्ष पुष्पकमल दाहाल प्रचण्डले स्वीकार गरेका छन् ।

बुधबार सहिद रामवृक्ष यादवको २७औं स्मृति दिवसका अवसरमा पार्टी कार्यालय पेरिसडाँडामा आयोजित कार्यक्रमलाई सम्बोधन गर्दै प्रचण्डले भने, “पार्टीमा धेरथोर सबैमा व्यक्तिवादी प्रवृत्ति भएको छ । सबैले आत्मसमीक्षा गर्नुपर्ने बेला भएको छ । सिद्धान्त, निष्ठा र वर्गप्रति समर्पित पार्टी हो, यसको सिद्धान्त अरूसँग मिल्दैन।”

कम्युनिष्ट आन्दोलनलाई बलियो बनाएर अगाडि बढ्न खोज्दा सम्पूर्ण उपलब्धिलाई धराशायी बनाउनका लागि कम्युनिष्ट पार्टीभित्र देखा परेको उनले बताएका छन् ।

प्रचण्डले भने, “हामीले कम्युनिष्ट आन्दोलनलाई बलियो बनाउन चाहेका थियौँ। तर, सम्भव भएन । हामीले पनि त्यसको लागि विद्रोह गर्नुपर्ने स्थिति देखेर प्रतिवाद गयौँ । र, हामीले आफैँलाई सच्चाउँछौँ भनेर आत्मसमीक्षा गरेर गलत कदमको विरोध गरेका थियौँ । र, सफल पनि भयौँ ।”

प्रतिगमन परास्त गरेर संविधान लोकतन्त्रको रक्षा गर्ने सफल भए पनि यो अन्तिम लडाइँ नभएको बताएका छन् ।

प्रचण्डले भने, “सबै सकारात्मक शक्तिहरूलाई एकै ठाउँमा ल्याउनुपर्छ। क्रान्तिकारी विधि र पद्धतिको आधारमा हामीले राष्टियता अभियान थाल्ने हो । आन्तरिक रूपमा भएको विभेद हटाएर समाजवाद निर्माणको झण्डा उठाउँछौँ।”

शान्ति सम्झौता वा संघीय लोकतान्त्रिक गणतन्त्रपछि माओवादीको क्रान्तिकारी चरित्र र संस्कार उल्टो बनेको जिकिर गरे। उनले भने, “हामीले विचारलाई राम्रो गर्न सक्दा नेपालको कम्युनिस्ट र राजनीतिक आन्दोलन मात्र होइन, अन्तर्राष्ट्रिय कम्युनिस्ट आन्दोलनलाई पनि ठूलो योगदान गर्न सक्ने सम्भावना हाम्रो पार्टीसँग छ । तर, त्यसो गर्न सकिएन भने विसर्जन र विघटन र भूमरीमा पर्नसक्ने खतरा छ।”

केन्द्रीय कमिटी बैठकले एकताको झण्डा उठाउने संकल्प गरेसँगै विभेदको अन्त्य र वैदेशिक हस्तक्षेप विरुद्धको पनि झण्डा उठाएर समाजवादका लागि लड्ने बाटो तय गरेको उनको भनाइ छ ।