कांग्रेस केन्द्रीय कार्यसमिति बैठक आज पनि बस्दै

काठमाडौँ- आज पनि नेपाली कांग्रेसको केन्द्रीय कार्यसमिति बैठक बस्दैछ। बिहीबार सभापति शेरबहादुर देउवाको निजी निवास बूढानीलकण्ठमा सुरु भएको बैठक शनिबार दिउँसो २ बजेका लागि बोलाइएको छ ।

पार्टी कार्यालयका मुख्य सचिव कृष्णप्रसाद पौडेलले बैठकमा केन्द्रीय समिति सदस्यहरुले आफ्नो धारणा राख्ने क्रम जारी रहने जानकारी दिएका छन् । जारी बैठकमा उपसभापति विमलेन्द्र निधिले पेश गरेको प्रतिवेदन र महमन्त्री पूर्णबहादुर खड्काले प्रस्तुत गरेका विभिन्न प्रस्तावमाथि केन्द्रीय सदस्यहरुले आफ्नो धारणा राखिरहेका छन् ।

बैठकमा बोल्ने नेताहरुले मुख्यगरी आगामी भदौ १६ देखि गर्ने भनिएको पार्टीको १४ औं महाधिवेशनको म्याद धेरै पछाडि सार्न नहुनेमा जोड दिएका छन् । संस्थापन पक्षका केन्द्रीय सदस्यहरुले सभापति देउवाबाटै आएको प्रस्तावअनुसार महाधिवेशन मंसिरसम्म गर्न सकिने बताइरहँदा संस्थापन इतरपक्षका सदस्यहरुले भदौमै महाधिवेशनको कार्यतालिकामा प्रवेश गर्नुपर्नेमा जोड दिएका छन् ।

प्रवक्ता विश्वप्रकाश शर्माले केन्द्रीय सदस्यहरुले बोल्नेक्रम सकिएपछि प्राप्त सुझावका आधारमा महाधिवेशनको नयाँ कार्यतालिका सार्वजनिक गरिने बताएका छन् । यही साउनको १२ गते सुरु गर्ने भनिएको स्थानीय तहस्तरको अधिवेशन प्रभावित भएपछि त्यसपछिका सबै कार्यतालिका प्रभावित भएको सन्दर्भमा केन्द्रीय कार्यसमितिको बैठकले सबै तहको अधिवेशनका लागि नयाँ कार्यतालिका सार्वजनिक गर्ने प्रवक्ता शर्माको भनाइ छ ।