विद्यार्थीको भविष्य र स्वास्थ्यमाथि खेलवाड नगर : गगन थापा

काठमाडौँ- विद्यार्थीको भविष्य र स्वास्थ्य माथि खेलवाड नगर्न सम्बन्धित पक्षसँग नेपाली कांग्रेसका नेता गगन थापाले आग्रह गरेका छन् ।

थापाले सामाजिक सञ्जालमार्फत वैकल्पिक माध्यमबाट परीक्षा सञ्चालन गर्न ध्यानाकर्षण गराउँदा पनि स्वास्थ्य सुरक्षाका मापदण्ड पालना नगरी परीक्षा सञ्चालन भइरहेको भन्दै स्वास्थ्य माथि खेलवाड नगर्न आग्रह गरेका हुन् ।

एउटै हलमा धेरै विद्यार्थी राख्दा संक्रमणको जोखिम बढ्ने उनको भनाइ छ । साथै, उनले छुट्टै व्यवस्था नहुँदा संक्रमितहरू आफ्नो अवस्था लुकाई परीक्षा दिन बाध्य भएको र यसले संक्रमण जोखिम बढाएको बताए ।

उनले भने, “एकातिर स्वास्थ्य तथा जनसंख्या मन्त्रालयले तेस्रो लहरबारे बताइरहने अर्कोतर्फ परीक्षा सञ्चालन गरेर संक्रमणको जोखिम बढाइरहने? कि स्वास्थ्य सुरक्षा मापदण्ड पालना गराऊ नत्र वैकल्पिक माध्यमबाट परीक्षा चलाऊ! तर,विद्यार्थीको भविष्य र स्वास्थ्यमाथि खेलबाड नगर ।”

यस बारेमा मंगलबार प्रधानमन्त्री शेरबहादुर देउवालाई भेटेरै ध्यानाकर्षण गराएको उनको भनाइ छ । भेटमा पधानमन्त्रीले यो विषयलाई गम्भीरताका साथ लिएको र तत्काल पहलकदमी लिई ठोस निर्णय गर्ने विश्वास दिलाएको थापाको भनाइ छ ।