यो सरकार कुबाटोबाट बन्यो : ओली

काठमाडौँ- अहिलेको सरकार कुबाटोबाट बनेको नेकपा एमालेका अध्यक्ष केपी शर्मा ओलीले बताएका छन् । आइतबार पुष्पलाल स्मृति प्रतिष्ठानद्वारा आयोजित कार्यक्रममा उनले सरकार निर्वाचनको माध्यमबाट नबनेको दोहोर्‍याएका हुन् ।

ओलीले भने, “निर्वाचन र जनादेशको माध्यमबाट अर्को सरकार आउँछ भने त्यसलाई प्रतिगमन भनिँदैन। तर, निर्वाचनको माध्यम र जनादेशको बाटोबाट होइन, कुबाटोबाट सरकार बन्यो।”

उनले सरकार गठनको लागि आफ्नै पार्टीका नेताहरुले सहयोग गरेको भन्दै असन्तुष्टि जनाएका छन् । उनले भने, “हाम्रै पार्टीका केही नेताहरु दक्षिणपन्थीको पछिपछि नलागेको भए यो अवस्था आउने थिएन। उनीहरुले निर्लज्ज र धोकेवाज काम गरे ।”

ओलीले पाँच दलीय गठबन्धनमा माधवकुमार नेपाल पक्षको सहभागिताप्रति पनि आक्रोश व्यक्त गरे । उनले भने, “आफ्नो सरकार ढालेर प्रतिपक्षमा पुर्‍याइएको छ र सत्ता पक्षको बैठक भन्दै बेसरम हुँदै सहभागिता जनाइएको छ।”

उनले यो देशको विकास र सुशासनको लागि कम्युनिस्ट नै चाहिने बताएका छन् ।