सुरु भयो जसपा संसदीय दलको बैठक

काठमाडौँ- जनता समाजवादी पार्टी (जसपा)को संसदीय दलको बैठक सुरु भएको छ । बैठक जसपाको संसदीय दलको कार्यालय सिंहदरबारमा सुरु भएको हो ।

बैठक बिहान ११ बजे बोलाइएको भएपनि अध्यक्ष उपेन्द्र यादव र संघीय परिषद् अध्यक्ष बाबुराम भट्टराई पुग्न ढिला भएपछि बैठक अबेर सुरु भएको हो ।

बैठकले संसदीय दलको नेता चयन गर्नेछ । निर्वाचन आयोगबाट जसपा अध्यक्ष उपेन्द्र यादव पक्षले आधिकारिकता पाएपछि दलको नेता चयन गर्न लागिएको हो ।

निर्वाचनको एउटा प्रक्रिया पूरा गर्नु पर्ने भएकाले दलको नेता चयन गर्न लागिएको जसपा नेता मोहम्मद इस्तियाक राईले जानकारी दिएका छन् । दलको नेतामा सर्बसम्मतिले अध्यक्ष यादव चयन हुने भएका छन् ।

जसपा एक भए पनि संसदीय दलको विधान बन्न नसक्दा दलको नेतामा महन्थ ठाकुर राजपा र उपेन्द्र यादव समाजवादी पार्टीको दलका नेता थिए । जसपा आधिकारिकता उपेन्द्रले पाएपछि पुनः दलको नेता चयन प्रक्रियामा जाने लागेको हो ।

जसपामा उपेन्द्रपक्षमा २२ सांसद छन्। बाँकी १० सांसद महन्थतिर लागेका छन्।