एमालेले स्थायी कमिटी बैठक आज बस्दै

काठमाडौँ- आज दिउँसो ३ बजे नेकपा एमालेले स्थायी कमिटी बैठक बोलाएको छ ।एमालेका कार्यालय सचिव शेरबहादुर तामाङले शनिबार तुलसीलाल स्मृति भवन च्यासलमा बैठक बोलाइएको नेकपा जानकारी दिएका छन् ।

तामाङले आजको बैठकमा केन्द्रीय विभागहरुको पूर्णता, विधान महाधिवेशनको तयारी, पार्टी सदस्यता नवीकरण र बितरणबारे छलफल हुने जानकारी दिएका छन् ।

आफूनिकट नेताहरुसँग एमाले अध्यक्ष केपी शर्मा ओलीले पार्टीका वरिष्ठ नेता माधवकुमार नेपाललाई धेरै पर्खिन नसक्ने स्पष्ट पारेका छन् । त्यसकै लागि ओलीले आफ्नो समूहमा शनिबारसम्मको ‘डेडलाइन’ तोकेका छन् र त्यो समयसम्म सहमति नजुटे स्थायी कमिटी बैठकबाट अघि बढ्ने तयारी गरेका छन् ।

फुटको संघारमा पुगिसकेको एमालेलाई एकताबद्ध पार्ने भन्दै ओली र नेपाल पक्ष दुवैले पाँच–पाँच जनाको कार्यदल बनाएका थिए । त्यो कार्यदलले १० बुँदे सहमतिको प्रस्ताव ओली र नेपाललाई बुझाएको थियो । ओली अब त्यही सहमतिअनुसार स्थायी कमिटीबाट निर्णय गरेर अघि बढ्ने ‘मूड’मा पुगेको उनीनिकट एक नेताले नेपाल लाइभलाई बताए।