सत्ता गठबन्धनको बैठक बस्दै, आजै मन्त्रिमण्डल विस्तारको तयारी

काठमाडौँ- आज पनि सत्तारुढ गठबन्धनमा सहभागी शीर्ष नेताको बैठक बस्ने भएको छ ।

नेपाली कांग्रेसका नेता पुर्णबहादुर खड्काले आज विहान साढै आठ बजे बैठक प्रधानमन्त्री निवास बालुवाटारमा बस्ने जानकारी दिएका छन् । नेपाली कांग्रेस, नेकपा माओवादी केन्द्र, नेकपा एमाले (माधव नेपाल समूह ), जनता समाजवादी पार्टी र राष्ट्रिय जनमोर्चाका शीर्ष नेताहरुको बैठक बस्न लागेको हो । खड्काका अनुसार आजको बैठकमा मन्त्रिपरिषद् विस्तार, विभिन्न नियुक्तिलगायत विषयमा छलफल हुने छ ।

उनले बैठकमा मन्त्रालय भागबण्डाको विषयमा समेत छलफल हुने भएकाले आजै मन्त्रिपरिषद् विस्तार हुन सक्नेसमेत बताएका छन् । गठबन्धनका शीर्ष नेता सहभागी हुने बैठकमा सरकारका अन्य काम–कारबाहीका विषयमा समेत छलफल प्रधानमन्त्री शेरबहादुर देउवाको सचिवालयले जानकारी दिएको छ ।

यसअघि बुधबार बिहान बसेको बैठकमा जतिसक्दा छिटो मन्त्रिपरिषद्लाई पूर्णता दिने र सरकारको न्यूनतम साझा कार्यक्रम ल्याउने समझदारी बनेको थियो ।