माओवादीको स्थायी कमिटी बैठक सुरु

काठमाडौँ- नेकपा माओवादी केन्द्रको स्थायी कमिटी बैठक सुरु भएको छ ।

अध्यक्ष पुष्पकमल दाहाल प्रचण्डको सचिवालयका अनुसार पार्टी केन्द्रीय कार्यालय कोटेश्वर पेरिसडाँडामा बसिरहेको बैठकमा समसामयिक राजनीतिका विषयमा कुराकानी भइरहेको छ ।

बैठकले सरकारमा जाने मन्त्रीहरुको नाम टुंगो लगाउन सक्ने अनुमान गरिएको छ । प्रधानमन्त्री शेरबहादुर देउवाले मन्त्रिपरिषद विस्तार गर्न लागेको र विहान प्रचण्ड देउवालाई भेट्न बालुवाटार पुगेकाले मन्त्री चयन हुन सक्ने स्रोतको भनाइ छ ।

प्रचण्डका प्रेस संयोजक विष्णु सापकोटाले भने सामान्य छलफल भए पनि यहि बैठकबाट मन्त्रीको नाम नटुंगिने बताएका छन् ।

सापकोटाले थप भने, “अध्यक्षले विहान प्रधानमन्त्रीसँग भेट्नुभएको थियो, त्यहि विषयमा उहाँले बैठकमा ब्रिफिङ गर्नुहुन्छ । केन्द्रीय समितिको बैठक पनि बोलाइएको छ त्यस विषयमा पनि छलफल हुन्छ।”

माओवादी केन्द्रले यहि २० गते केन्द्रीय समितिको बैठक बोलाएको छ ।