नयाँ सरकारलाई ओली सरकारको जस्तो अपराध गर्ने छुट छैन : थापा

काठमाडौँ- नयाँ सरकारलाई तत्कालिन केपी शर्मा ओली नेतृत्वको सरकारको जस्तो कुनै पनि अपराध गर्ने छुट नभएको नेपाली कांग्रेसका नेता तथा सांसद गगन थापाले बताएका छन् ।

मंगलबार प्रतिनिधिसभाको शून्य समयमा ओली नेतृत्वको तत्कालीन सरकारका बेथिति औंल्याउँदै त्यस्तो अपराध गर्ने छुट नयाँ सरकारलाई नभएको स्पस्ट पारेका हुन् ।

संसदले सरकारलाई विश्वासको मत दिएसँगै नयाँ अध्याय प्रारम्भ भएको भन्दै थापाले यो अध्यायको सुखान्तका लागि सरकार र संसद दुवैसँग नयाँ अपेक्षाहरु रहेको बताएका छन् ।

थापाले भने, “संसदलाई हेप्ने, अदालतलाई हप्काउने, न विधि मान्ने, न विज्ञानलाई पत्याउने, स्थानीय र प्रदेश सरकारलाई पङ्गु बनाउने, जनताको दुहाई दिने तर आसेपासे पोस्ने, बाहिर सिंहजस्तो गर्जने, भित्र लम्पसार पर्ने, यस्तै यस्तै परिचय बनाएर बालुवाटारबाट बार्दली पुगेको छ अघिल्लो सरकार।”

उनले नयाँ सरकारलाई यस्तो कुनै पनि अपराध गर्ने छुट नभएको बताएका छन् । उनले भने, “यस्तो हुन नदिन संसदले पनि संकल्प गर्नुपर्छ । न त यो संसदलाई बेवास्ता गर्न दिइने छ, न त कामविहीन बनाउन । न त मनोमानि ढङ्गले स्थगित गर्न दिइने छ न त छल्न । यो संसद सरकारसँग डराउने होइन । सरकार यो संसदसँग डराउनुपर्ने छ– सांसदको प्रश्नसँग, संसदको निगरानीसँग।”

प्रधानमन्त्रीको मात्र नभएर सभामुख र यो संसद जोगाउन लाग्ने प्रत्येक सांसदको परीक्षाको घडी आएको पनि उनले बताएका छन् ।