कांग्रेस पदाधिकारी बैठक बस्दै

काठमाडौं- नेपाली कांग्रेसको पदाधिकारी बैठक मंगलबार बिहान बस्दै छ। बिहान १० बजे सभापतिसमेत रहेका प्रधानमन्त्री शेरबहादुर देउवाको निजी निवास बूढानीलकण्ठमा बस्न लागेको हो।

काठमाडौँ- आजको बैठक महाधिवेशनको विषयमा केन्द्रित रहने एक नेताले बताएका छन् । यसअघि रोकिएको वडा अधिवेशन कहिले गर्ने भन्नेबारे आजको बैठकमा छलफल हुने बताइएको छ ।

बैठकले तल्लो संरचनाको अधिवेशनको नयाँ मितिबारे निर्णय गर्ने बताइएको छ । यसअगाडि मंगलबारदेखि सुरु हुने भनिएको तल्लो तहको अधिवेशन स्थगित गरिएको थियो ।

बैठकले नयाँ मितिको टुंगो लगाउने छ । यस्तै, शीर्ष तहमा भएको सहमति अनुसार केन्द्रीय समितिले उक्त निर्णयको अनुमोदन गर्नेछ ।

यस्तै रमेश लेखक नेतृत्वको केन्द्रीय क्रियाशील छानबिन समितिले आज प्रतिवेदन बुझाउने तयारीसमेत गरेको छ ।

समितिले मंगलबार बिहान ९ बजे पार्टी सभापति शेरबहादुर देउवालाई क्रियाशील सदस्यहरुको नामावली बुझाउने भएको हो । समितिका प्रवक्ता प्रदीप पौडेलले भने, “हामीले गर्नसक्ने सबै कार्य गरिसक्यौं। ९८ प्रतिशतको नामहरु छानबिन गर्‍यौं। टुंगो पनि लगायौं । २ प्रतिशत जति स्थगित गरेका छौं।”

सप्तरी र बाराको पुरै जिल्लामा नयाँ सदस्य र नवीकरणमा विवाद रहेको जनाउँदै समितिले त्यसमा समाधान निकाल्ने जिम्मेवारी शीर्ष तहलाई सुम्पने भएको छ । सिन्धुपाल्चोक र रसुवामा समायोजनका क्रममा अस्पष्ट भएको निष्कर्ष निकाल्दै समितिले प्रतिवेदन बुझाउने भएको छ ।

उक्त समितिमा पाँच हजार उजुरी परेका थिए । समितिले लगभग ९८ प्रतिशत काम सकेर आज प्रतिवेदन बुझउने तयारी गरेको हो ।

क्रियाशील विवादले महाधिवेशनलाई नै प्रभावित बनाउने देखिएको छ। कांग्रेस महाधिवेशन भदौ १६ देखि १९ गतेसम्म गर्ने कार्यतालिका छ ।