एमाले कमिटी बैठक आज पनि बस्दै

काठमाडौँ- आज पनि सोमबारदेखि जारी नेकपा (एमाले)को केन्द्रीय कमिटी बैठक बस्दै छ । बैठक च्यासलस्थित तुल्सीलाल स्मृति भवनमा सोमबार सुरु भएको हो । आज दिउँसाे ३ बजे बैठक बस्दै छ ।

प्रधानमन्त्री शेरबहादुर देउवालाई सोमबारको बैठकले विश्वासको मत दिएका एमालेका २२ सांसदलाई स्पष्टीकरण सोध्ने निर्णय गरेको थियो । आजकाे बैठकले उनीहरुमाथि कारबाहीकाे प्रक्रिया अघि बढाउने जनाइएकाे छ ।

उनीहरुलाई २४ घन्टे स्पष्टीकरण सोध्ने र कारबाहीको प्रक्रिया अघि बढाउने निर्णय बैठकले गरेको थियो ।

तर, सांसदहरुले यसबारे कुनै जवाफ दिएका छैनन् । प्रधानमन्त्री देउवाको पक्षमा मत दिने सांसदहरुले यो स्पष्टीकरणको औचित्य नरहेको भन्दै कुनै जवाफ नदिने बताएका छन् ।

असार २८ मा संसद पुनःस्थापन गर्न आदेश दिएको सर्वोच्च अदालतले देउवालाई विश्वासको मत दिएका सांसदलाई कुनै पनि पार्टीले कारवाही गर्न नपाउने फैसला गरेको थियो ।

तर, आज बस्ने केन्द्रीय कमिटी बैठकमा यी नेताहरुमाथि कारवाही गर्ने सम्भावना रहेको एक नेताले बताएका छन् ।