माधव नेपाललाई प्रचण्डको सुझाव- ओलीबाट धोका पाउनुहोला, ख्याल गर्नुस्

काठमाडौँ- एमाले वरिष्ठ नेता माधवकुमार नेपाललाई एमाले अध्यक्ष एवं प्रधानमन्त्री केपी शर्मा ओलीले धोका दिन सक्ने भन्दै चनाखो हुन नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले सुझाव दिएका छन् ।

एमाले एकता टुंगोमा पुग्नै लागेका बेला शनिबार वरिष्ठ नेता नेपालको निजी निवास कोटेश्वर पुगेर माओवादी अध्यक्ष दाहालले यस्तो आग्रह गरेका हुन् ।

स्रोतका अनुसार दाहालले प्रधानमन्त्री ओली विश्वासयोग्य नेता नभएको भन्दै उनको भर नपर्न नेता नेपालसँग आग्रह गरेका हुन् ।

दाहालले नेपालसँगको भेटमा भने, “ओलीजी विश्वासयोग्य नेता होइन। जहाँ जतिबेला पनि धोका हुन सक्छ। यसमा चाहिँ ख्याल गर्नुस् ।”

दाहालले नेपाललाई पाँच दलीय गठबन्धनबाट यताउता नलाग्न समेत आग्रह गरे । दाहाललाई उधृत गर्दै स्रोतले भन्यो, “ओलीजीबाट तपाईंहरूलाई फेरि धोका हुन सक्छ, त्यसैले हाम्रो साथ नछोड्नहोस् ।”

जवाफमा नेता नेपालले आफू निकटका नेताहरूसँग छलफल गरेर अघि बढ्ने बताएका थिए । नेपालनिकटक स्रोतले भने दुई नेताको भेटबारे विस्तृतमा उल्लेख गर्न चाहेन ।