एमाले कार्यदलको बैठक सुरु, सहमतिको आशा

काठमाडौँ- सिंहदरबारमा नेकपा एमालेभित्रको विवाद मिलाउन गठित कार्यदलको बैठक सुरु भएको छ । बिहान साढे ११ बजे बस्ने भनिएको बैठक तयारी नपुगेको भन्दै एक घण्टा सारिएको थियो । केही ढिला गरी भर्खरै सुरु भएको बताइएको छ ।

यसअघि, संस्थापन पक्षका कार्यदल संयोजक सुवास नेम्वाङ बैठकमा तयारी गर्नुपरेकाले एक घण्टा पछाडि सारिएको बताएका थिए । यसअघि बुधबार साँझ अध्यक्ष केपी शर्मा ओली र वरिष्ठ नेता माधवकुमार नेपालबीच लामो छलफल भएपछि एमाले विवाद टुंगिने दिशातर्फ अघि बढेको ठानिएको थियो ।

विवाद मिल्ने संकेत प्राप्त भएको भन्दै उत्साहित बनेका कार्यदलका नेताहरू बिहीबार दिउँसो बैठक बसेर सहमतिको खाका कोर्ने प्रयास गरेका थिए । तर, दिउँसोको बैठक एकैछिन बसेर साँझका लागि सरेको थियो ।

बैठकमा सहभागी नेपाल पक्षीय नेता रघुजी पन्तले साँझ बस्ने बैठकले सहमतिको मस्यौदा पेश गर्ने बताएका थिए । तर, साँझ सिंहदरबारस्थित अर्थ मन्त्रालयमा बस्ने भनिएको बैठकमा कार्यदलका ओली पक्षका नेता विष्णु पौडेल उपस्थित नभएपछि बैठक स्थगित भएको थियो ।

नेपाल पक्षीय नेता घनश्याम भुसालले बैठकमा सहभागी हुन सिंहदरबार पुगेका पछिल्ला दश दिनमा विवाद समाधानका लागि कुनै प्रगति नभएको खुलासा गरेका थिए । उनका अनुसार १० दिनअघि सहमतिका केही एजेण्डाहरु तयार गरिएको भए पनि विभिन्न कारणले त्यसमा कुनै प्रगति हुन सकेको छैन ।