एमाले कार्यदलको बैठक आज पनि बस्दै

काठमाडौँ- आज पनि नेकपा एमालेको आन्तरिक विवाद मिलाउन गठित कार्यदलको बैठक बस्ने भएको छ ।

हिजो साँझ सिंहदरबारमा बसेको बैठक सकारात्मक भएपछि आज दिउँसो १ बजे पुनः बैठक बस्ने भएको हो । माधव नेपाल पक्षीय कार्यदलका नेता भीम रावलले हिजोको बैठकमा आन्तरिक विवाद समाधानका लागि गम्भीर छलफल भएको बताएका छन् ।

पार्टी एकता कायम गरेर अघि बढ्ने र त्यसमा दुवै पक्ष थप गम्भीर हुने सल्लाह भएपछि हिजोको बैठक सकिएको थियो । बैठकमा सहभागी अर्का नेता गोकर्ण विष्टले पनि बैठक सकारात्मक र हार्दिक भएको बताएका थिए । आजको बैठकमा सहमतिका मिलनविन्दुहरु पहिल्याउन थप कोशिष गरिने बताइएको छ ।

आन्तरिक विवाद मिलाउन गत जेठ २ गते गठित कार्यदलमा दुवैपक्षका पाँच–पाँच जना नेता छन् । ओली पक्षबाट सुवास नेम्वाङ, विष्णु पौडेल, शंकर पोखरेल, प्रदीप ज्ञवाली र विष्णु रिमाल छन् भने नेपाल पक्षबाट भीम रावल, सुरेन्द्र पाण्डे, घनश्याम भुसाल, गोकर्ण विष्ट र रघु पन्त छन् ।

बीचमा लामो समय काम गर्न नसकेको कार्यदल आइतबार साँझ नेता भीम रावलले अध्यक्ष केपी ओलीसँग भेट गरेपछि पुनः सक्रिय बनेको हो।