कोरोना संक्रमणबाट नेपाली काँग्रेस दैलेखका पूर्व पार्टी सभापति थापाको निधन

सुर्खेत- कोरोना संक्रमणका कारण नेपाली काँग्रेस दैलेखका पूर्व पार्टी सभापति जगतजंग थापाको निधन भएको छ। दैलेखका काँग्रेस पार्टी सचिव भुपेन्द्र शाहीलेका अनुसार सोमबार थापाको निधन भएको हो ।

थापाको सोमबार बिहान ३ बजे दैलेख अस्पतालमा निधन भएको शाहीले बताएका छन् । थापा दैलेखको राजनीतिमा भद्र, सालिन छवि बनाएका राजनीतिज्ञमा स्थापित नेता हुन् ।

उनी पञ्चायत कालमा नेपाल युवक संगठनको भेरी अञ्चल हुँदै ०४७ सालमा बहुदल पश्चात नेपाली काँग्रेसमा प्रवेश गरेका थिए ।

२०५३ सालमा नेपाली काँग्रेस दैलेखको ९ औं अधिवेशनबाट पार्टी सभापति भएका थिए । आन्तरिक द्धन्द्धका कारण ०५६ मा नै उनी अपदस्थ हुनुपरेको थियो । हाल नेपाल बाल संगठनको जिल्ला सभापति एवं केन्द्रीय सदस्य, पार्टीको महासमिति सदस्य, शुभेच्छुक संस्था समन्वय विभागका सदस्य समेत हुन् ।