कृषि क्षेत्रलाई सरकारले तहसनहस बनायो : वामदेव गौतम

काठमाडौँ- सरकारले किसान विरोधी कदम चालेर कृषि क्षेत्रलाई तहसनहस पार्ने काम गरेको आरोप नेकपा एमाले उपाध्यक्ष तथा अखिल नेपाल किसान महासंघका अध्यक्ष वामदेव गौतमले लगाएका छन् ।

नेता गौतमले धान दिवसको अवसरमा शुभकामना प्रदान गर्दै कृषि क्षेत्रको विकासमा सरकार बाधक भएको बताएका हुन् । सरकारले बहुराष्ट्रिय कम्पनीलाई नेपालको प्राथमिक उत्पादनको क्षेत्रमा प्रवेश गराउनका लागि वैदेशिक लगानी व्यवस्था ऐनको अनुसूची संशोधन गरेर अनुकूल गरेर किसानलाई बेरोजगार र घरबारविहीन बनाउन लागेको आरोप लगाएका छन् ।

विज्ञप्तीमा उनले भनेका छन् “हामीले पहिल्यैदेखि भन्दै आएका हौं, नेपालको कृषि क्षेत्रमा बहुराष्ट्रिय कम्पनीलाई प्रवेश गर्न दिइनुहुँदैन। यदि त्यसो गरियो भने नेपाली किसान जनताका हक, अधिकार र समृद्धिका सम्पूर्ण योजना भताभुङ्ग हुन्छन्। ”

आफूहरूले धेरै वर्षअघिदेखि भूमि बैंकको बिरोध गर्दै आएको नेता गौतमले बताएका छन् । उनले भने, “भूमि बैंक भनेको विश्व बैंक र अन्तर्राष्ट्रिय मुद्रा कोषहरूले अगाडि सारेका एजेण्डा हुन् । इण्डोनेशिया र फिलिपिन्समा पूर्णतः असफल भइसकेको यो कार्यक्रम अहिले हाम्रो देशमा ल्याउने काम वर्तमान सरकारबाट भएको छ। ”

उनले निश्चित व्यापारिक घरानालाई पोस्ने गरी करार खेती भित्र्याउन सरकार दत्तचित्त भएर लागेको भन्दै यो नेपालको संविधान–२०७२ मा उल्लेखित खास सम्प्रभुताको विरुद्ध रहेको समेत बताएका छन् ।