प्रचण्डले राजनीतिक प्रतिस्पर्धामा आफूलाई अग्लो देखाउन पूर्व राजा गुहारे : शंकर पोखरेल

काठमाडौँ- नेकपा माओवादी केन्द्रका अध्यक्ष पुष्पकमल दाहाल प्रचण्डबाट पूर्व राजालाई गुहार्ने काम पनि पूरा भएको लुम्बिनी प्रदेशका मुख्यमन्त्री शंकर पोखरेलले बताए ।

नेता पोखरेलका अनुसार राजनीतिक प्रतिस्पर्धामा आफूलाई अग्लो देखाउन पूर्वराजालाई गुहार्न बाँकी रहेको र त्यो काम बिहीबार प्रचण्डले पूरा गरेका छन् ।

अध्यक्ष प्रचण्डले बिहीबार सम्पादकहरुसँगको अन्तरक्रियामा अहिलेको राष्ट्रपति संस्थाभन्दा त उति बेलाका राजा नै ठीक भनेका थिए ।

उनले राष्ट्रपति विद्यादेवी भण्डारीले इज्जत, मान र प्रतिष्ठा गुमाएको उल्लेख गर्दै अहिलेको राष्ट्रपति संस्थाभन्दा राजा नै ठीक रहेको र कमसेकम राजाको सान त थियो भनेका थिए ।

पोखरेलले सामाजिक सञ्जालमा लेखेका छन्, “राजनीतिक प्रतिस्पर्धामा आफूलाई अग्लो देखाउन पूर्व राजालाई गुहार्न बाँकी थियो, हिजोबाट त्यो पनि पूरा भएछ । राजनीतिलाई अराजनीतिक बनाउने खेल अब के बाँकी रह्यो र?”