कांग्रेस केन्द्रीय समिति बैठक बस्दै

काठमाडौँ- आज नेपाली कांग्रेसको केन्द्रीय कार्यसमिति बैठक बस्दैछ । केन्द्रीय सदस्य प्रदीप पौडेलका अनुसार पार्टी केन्द्रीय कार्यलय सानेपामा दिउँसो दुई बजे बस्ने बैठक पार्टीको १४ औँ महाधिवेशनमा केन्द्रीत हुने छ ।

पछिल्लोपटक बसेको कांग्रेसको पदाधिकारी बैठकले आगामी भदौ ७ गते देखि गर्ने तय भएको महाधिवेशन भदौ १६ देखि गर्ने गरी सार्न प्रस्ताव गरेको थियो । पौडेलले उक्त प्रस्ताव छलफल गरी निर्णय गर्नका लागि आज केन्द्रीय समिति बैठक बस्न लागेको जानकारी दिएका छन् । कांग्रेसले कोरोना महामारीका कारण क्रियाशील सदस्यता वितरण र नवीकरणको काममा ढिलाइ हुँदा पूर्वनिर्धारित कार्यतालिका केही हेरफेर गरी महाधिवेशन गर्ने जनाएको छ ।

भदौ १६ देखि १९ गतेसम्म काठमाडौंमा महाधिवेशन गर्ने गरी तयारी गरिएको छ । नेता पौडेलले कोरोना महामारी कायमै रहेको अवस्थामा कसरी महाधिवेशन सम्पन्न गर्ने भन्नेबारे पनि आजको बैठकमा छलफल हुने बताएका छन् । कांग्रेसले १० लाख क्रियाशील सदस्य बनाउने भनेकोमा अहिलेसम्म करिव ८ लाख सदस्य बनेका जनाएको छ ।