असार १५ देखि रेल चलाउने तयारी गर्नू : मन्त्री नेम्वाङ

काठमाडौँ- असार १५ देखि रेल चलाउने गरी तयारी गर्न रेल विभागलाई भौतिक पूर्वाधार तथा यातायात मन्त्री वसन्तकुमार नेम्वाङले निर्देशन दिएका छन् ।

पानीजहाज कार्यालय, मेट्रो रेल विभाग र यातायात व्यवस्था विभागका प्रमुखहरुसँग छलफल गर्ने क्रममा मन्त्री नेम्वाङले आवश्यक तयारी सकेर असार १५ गते प्रधानमन्त्रीबाट रेलको उद्घाटन गर्नेगरी काम गर्न निर्देशन दिएका हुन् । उनले त्यसका लागि आवश्यक समन्वयका लागि मन्त्रालय तयार रहेको बताएका छन् ।

उनले भने, “लकडाउन खुल्नेबित्तिकै छिटो जनकपुर–जयनगर रेल सञ्चालन गर्नुपर्छ। मैले भन्नुपर्‍यो भने त तपाई असार १५ गतेदेखि रेल चलाउने गरी तयारीमा लाग्नुस् भन्छु । त्यसका लागि चाहिने के–के हो बुँदागत रुपमा तयारी गर्नुस्, १५ गते प्रधानमन्त्री लगेर रेल उद्घाटन गर्ने हो लकडाउन पूर्णरुपमा खुल्दा । भएन भने भर्चुअलबाट पनि हुन्छ ।”

पानीजहाज सञ्चालनका लागि तयारी गर्न तथा नदीनालाहरूमा सम्भाव्यता अध्ययनको काम अघि बढाउन पानीजहाज कार्यालयलाई पनि ​मन्त्री नेम्वाङले निर्देशन दिएका छन् ।

उनले भने, “साना वोटहरु हाम्रा नदी नालामा सञ्चालन गर्ने, सम्भाव्यता अध्ययन गर्ने र आगामी आर्थिक वर्षमा बजेटमा समावेश भएका कार्यक्रमलाई कार्यान्वयन गर्नेतर्फ तदारुकताका साथ ध्यान दिन अनुरोध गर्न चाहान्छु। ”

मन्त्री नेम्वाङले पानीजहाज सञ्चालनको निम्ति रुट बनाउँदा खुवालुङको ढुंगाको संरक्षण गर्ने कुरा पनि स्पष्ट पारेका छन् । उनको खुवालुङको सम्बन्धमा उठेका जन आवाजलाई ध्यान दिने भनाई छ । त्यसलाई ध्वस्त पारेर, नष्ट पारेर गर्न नखोजेको कुरा स्पष्ट पार्न पनि उनले निर्देशन दिएका छन् ।