नयाँ भूमिका चाहने दीपक मनाङेलाई किन वञ्चित गर्ने? : अध्यक्ष भट्टराई

काठमाडौँ- गण्डकी प्रदेशका स्वतन्त्र सांसद राजीव गुरूङ ( दीपक मनाङे) लाई जनता समाजवादी पार्टी (जसपा) नेपालका संघीय परिषद् अध्यक्ष बाबुराम भट्टराईले रत्नाकर बालमिकीसँग तुलना गरेका छन् । डा भट्टराईले कुनै पनि मान्छे जन्मजात अपराधी नहुने बताउँदै नयाँ जीवन र नयाँ भूमिका चाहने गुरुङलाई किन वञ्चित गर्ने भनेर प्रश्न पनि गरेका छन् ।

उनले भने, “मेरो सुविचारित र अनुभवजन्य मान्यता छ- कुनै पनि मान्छे जन्मजात अपराधी हुन्न । समाज/राज्यले मान्छेलाई अपराधी बनाउँछ । साथै वर्गीय/जातिय/लैंगिक विभेद भएको समाजमा राज्य/समाजको वर्चस्वशाली तप्काले उत्पीडित/बहिष्कृत तप्कालाई सहजै ‘अपराधी’ बनाइदिन सक्छ । अत:अपराध/अपराधी एक सापेक्ष अवधारणा हो ।”

उनले भने , “राजीव गुरूङ अहिले गण्डकी प्रदेशको मन्त्री बनेपछि र यसक्रममा मसँग पनि भेटेपछि मिडियामा विभिन्न टीकाटिप्पणी भएका छन् ,यसलाई अन्यथा मान्नु हुन्न । रत्नाकर बाल्मिकी बनेको हामी सबैले सुनेकै छौँ। त्यसैले राजीव गुरूङहरूले नयाँ जीवन र नयाँ भूमिका चाहन्छन् भने किन बन्चित गर्ने ? किन पूर्वाग्रह राख्ने ?”