शुरू भयो सभामुखले बोलाएको सर्वदलीय बैठक, प्रधानमन्त्री अनुपस्थित

काठमाडौँ- सभामुख अग्नि सापकोटाको आव्हानमा प्रतिनिधि सभा विघटनपछिको विकसित राजनीतिक घटनाक्रमको सम्बन्धमा छलफल गर्न सर्वदलीय बैठक शुरु भएको छ । संसद भवन नयाँ बानेश्वरको ल्होत्से हलमा शुरु बैठकमा विपक्षी गठबन्धनका नेताहरु सहभागि छन् ।

कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्ड, जनता समाजवादी पार्टी (जसपा)का अध्यक्ष उपेन्द्र यादव, एमाले नेता माधव कुमार नेपाल लगायत बैठकमा छन् । प्रतिनिधि सभा विघटनपछिको अवस्थाबारे बैठकमा छलफल हुँदैछ ।

प्रधानमन्त्री एवं नेकपा एमालेका अध्यक्ष केपी शर्मा ओली सर्वदलीय बैठकमा सहभागि नहुने भएका छन् । सभामुख सापकोटाले पूर्वप्रधानमन्त्री र संसदमा प्रतिनिधित्व गरेका राजनीतिक दलका नेतालाई बैठकमा बोलाएका थिए ।

सभामुखले प्रधानमन्त्री ओलीलाई पत्र पठाएर बैठकमा सहभागि जनाउन आग्रह गरेका थिए । एमालेका एक शीर्ष नेताले भने, “सभामुखज्यूले प्रधानमन्त्रीलाई पत्र पठाएर बैठकमा सहभागि हुन आग्रह गर्नुभएको रहेछ, तर सर्वोच्च अदालतमा प्रतिनिधि सभा विघटन सम्बन्धी विषय विचाराधीन रहेको समयमा त्यो बैठकमा प्रधानमन्त्रीज्यू सहभागि हुनुहुन्न।”

यसअघि उनले पूर्व सभामुख र संविधानविद्हरुसँग परामर्श गरेका थिए ।