भारतले नेपाललाई खोपमा सहयोग गर्नैपर्छ : प्रधानमन्त्री ओली

प्रधानमन्त्री केपी शर्मा ओलीले नेपालमा फैलदो कोभिड नियन्त्रण, कोभिडविरुद्धको लडाईमा भारतले अन्य मुलुकलाई भन्दा फरक ढंगले सहयोग गर्न पर्ने बताएका छन् । नेपाल र भारत खुला सीमा मात्र होइन कतिपय स्थानमा त दशगजा समेत थाहा नभएको अवस्थामा नेपाललाई गर्ने सहयोगमा भारतको विशेष ध्यान जानुपर्ने उनले बताएका छन् ।

त्यस्तै उनले भारतमा कोभिड नियन्त्रण भयो र नेपालमा हुन सकेन भने त्यसको कुनै अर्थ नहुने पनि बताएका छन् । उनले भारतबाट चाहे जस्तो सहयोग कोभिड नियन्त्रणमा नपाएको घुमाउरो शैलीमा भने पनि पहिलो पटक नै खोप उपलब्ध गराएको र अन्य स्वास्थ्य सामग्री पनि सहयोग गरेकोमा धन्यवाद पनि भने ।

उनले भने, “म प्रधानमन्त्री मोदीलाई अनुरोध गर्न चाहन्छु । मानिसहरू बीच हरेक कुराका निम्ति आवतजावत हुन्छ । यी र हाम्रो मित्रतापूर्ण सम्बन्धलाई ध्यानमा राखेर भारतले पूर्ण सहयोग गर्नुपर्छ । त्यसको अर्थ मैले भारतबाट सहयोग नपाएको भनेको होइन ।” उनले चीनको विषय ल्याएर राजनीति गर्न नहुने पनि बताएका छन् । यतीबेला नेपाललाई खोप चाहिएको छ त्यसको लागि नेपालले दुवै छिमेक र सबै मुलुकलाई आग्रह गर्नेछ र गरिरहेको छ ।

उनले भने, “खोप भारतले दिए पनि, चीनले दिए पनि, अमेरिका, युके जसले दिए पनि ठीक छ । त्यसैकारण यसमा राजनीति गर्न जरुरी छैन र दुवै छिमेकीलाई हामी धेरै धन्यवाद दिन्छौं। किनभने एउटा (चीन) ले हामीलाई १८ लाख खोप दिएको छ, अर्को (भारत)ले २१ लाख खोप दिएको छ । दुवैको मद्दत हामीले पाइराखेका छौं । दुवैबाट हामीलाई मेडिकल उपकरणहरू पनि मिलिरहेको छ । त्यसलैले हामी दुवैलाई धन्यवाद दिन्छौं ।”