संसद विघटनविरुद्ध अदालतले फेरि पहिलेजस्तै फैसला गर्नेछ : प्रचण्ड

काठमाडौं- सरकारले गरेको असंवैधानिक कदमविरुद्ध राजनीतिक र कानूनी प्रतिवाद गर्ने नेकपा माओवादी केन्द्रका अध्यक्ष प्रचण्डले बताएका छन् । आफूहरु संसद विघटनविरुद्ध अदालत जानेर अदालत पहिलेजस्तै संसद पुनःस्थापनाको फैसला गर्ने उनले दावी गरे ।

विपक्षी गठवन्धनको वैठकपछि प्रचण्डले भने, “यो कदम असंवैधानिक मात्र होइन, निरंकुश, स्वैच्छाचारी र प्रतिगमनकारी छ । यो प्रतिगमनकारी कदमका विरुद्ध सर्वोच्च जान्छौ । हिजो १४९ जनाले दावी प्रस्तुत गरेका थियौं उहाँहरु सबैको हस्ताक्षरसहित सर्वौच्च जान्छौं ।”

उनले अघिल्लोपटक संसद विघटनविरुद्ध अदालत र सडकबाट प्रतिवाद गरिएको भन्दै यसपाली पनि त्यसै गरिने बताए।

उनले भने, “अदालतले अन्ततः फेरि एकपटक लोकतन्त्र र संविधानको पक्षमा फैसला गर्दै संसद पुनःस्थापना गर्नेछ । त्यो पहिलो एपिसोडमै देखिएको हो। “