कांग्रेसले बोलायो पदाधिकारी र पूर्वपदाधिकारीको आकस्मिक बैठक

काठमाडौं- साविक प्रतिपक्षी नेपाली कांग्रेसले पदाधिकारी तथा पूर्वपदाधिकारीको आकस्मिक बैठक डाकेको छ। सरकारको सिफारिसमा राष्ट्रपति विद्यादेवी भण्डारीले प्रतिनिधिसभा विघटन गर्दै मध्यावधि चुनाव घोषणा गरेपछि आकस्मिक बैठक डाकेको हो ।

पार्टी सभापति शेरबहादुर देउवाको निवास बूढानीलकण्ठमा अहिले बैठक बस्दैछ । प्रवक्ता विश्वप्रकाश शर्माले बैठकमा संसद् विघटन र मध्यावधि चुनाव घोषणाबारे पार्टीका तर्फबाट आवश्यक निर्णय लिन छलफल हुने जानकारी दिएका छन्‌ । साथै, उनले आगामी रणनीति पनि यही बैठकले तय गर्ने बताएका छन्‌ ।

राष्ट्रपति भण्डारीले प्रधानमन्त्री केपी ओलीको सिफारिसमा शुक्रबार राति संसद्‌ विघटन गर्दै आगामी कात्तिक २६ र मंसिर ३ गते मध्यावधि चुनाव मिति तोकेकी छिन्‌।