चीनले भुमी अतिक्रमण गर्दा र सगरमाथाको आफ्नो नक्शामा राख्दा पनि किन मौन छ सरकार ?

काठमाडौँ  – चीनले सर्वोच्च शिखर सगरमाथा चुचुरोसम्म प्रभाव गर्ने गरी फाइभ जी इन्टरनेट प्रविधि ६५०० मीटर को उचाइमा जडान गरिसकेको छ र सगरमाथाको उचाई नापिरहेको छ ।

चीनले सगरमाथाको उचाई सार्वजनिक गरेर चुचुरो आफ्नो पनि हो भनी विश्वलाई देखाउन खोजिरहेको छ र यसमा सरकार सहयोगी बनिरहेको छ ।

सर्वोच्च शिखर सगरमाथा नेपालमा पर्छ भनी विश्वले नै मानेको छ । तर, चुचुरोलाई चीनले आफ्नो नक्शामा राखेको छ । गुगल नक्शामा हेर्यो भने चुचुरो चीनतर्फ देखाउँछ ।

नेपालको उत्तरतर्फको भुभाग चीनले अतिक्रमण गरेको खबरहरु आइरहेको छ । हुम्ला, रसुवा, संखुवासभा, सिन्धुपाल्चोक लगायत जिल्लाहरु गरी चीनले ३३ हेक्टर जग्गा अतिक्रमण गरेको छ । तर यो बिषयलाई लिएर सरकार अझै मौन छ ।

भारतले अतिक्रमण गरेको कालापानी, लिपुलेक र लिम्पियाधुराको बारेमा सबै दल बोले र नयाँ नक्शा पनि राष्ट्रिय सहमतिका साथ जारी गरे । तर, चीनले भुमि अतिक्रमण गरेको र चिनियाँको नेपालमा गम्भीर गतिविधिबारे खुलासा हुँदा पनि सत्तारुढ नेपाल कम्युनिस्ट पार्टी र सरकार मौन रहनुलाई गम्भीरताका साथ लिइएको छ ।

अहिले चिनियाँ कम्युनिस्ट पार्टी र नेकपाबीच नजिकको सम्बन्ध रहेको छ । नेकपामा चीनको प्रभावबारे विषय उठिरहेको छ । चीनले भुमि अतिक्रमण गर्दा सरकार र नेकपाको मौनताले उसमाथि लागेको चीनपरस्तको आरोप पुष्टि हुने बलियो आधार बन्दै गएको छ ।

पूर्व गृहमन्त्री समेत रहेका नेपाली काँग्रेसका उपसभापति विमलेन्द्र निधिले हिमालय र सगरमाथाबारे आपतिजनक गतिबिधि र चिनद्वारा कब्जा गरिएको,कोरोनाबारे सहयोग र चिनिया भाषा ढाउने नाममा चिनियाँ सेना नेपाल पसेको भन्दै ट्वीटरमै लेखेका छन् । उनले सरकारलाई चिनिया पार्टीले तालिम दिएको र यसको जवाफ सरकारसंग माग गरेका छन् ।