तत्काल स्थायी कमिटी बैठक बोलाउन माग

काठमाडौँ – नेपाल कम्युनिष्ट पार्टी (नेकपा) का २० जना स्थायी कमिटी सदस्यको भेलाले तत्काल स्थायी कमिटी बैठक बोलाउन माग गरेका छन् ।

पार्टी केन्द्रीय कार्यलय धुम्बाराहीमा भएको भेलाले तत्काल स्थायी कमिटी बैठक बोलान माग गरिएको नेकपा स्थायी कमिटी सदस्य टोप बहादुर रायमाझीले जानकारी दिएका छन् । तत्काल स्थायी कमिटी बैठक बोलाएर बैठकमा सबै विषयमा छलफल हुनुपर्ने विषयमा सबै सदस्यको एक मत रहेको उनले बताए ।

नेकपाले आज ११ बजेका लागि बोलाएको स्थायी कमिटी बैठक एजेण्डामा सहमति जुट्न नसक्दा स्थगित भएको छ । यसअघि वैशाख १० गते भीम रावल, सुरेन्द्र पाण्डे, मातृका यादव, टोपबहादुर रायमाझी लगायत २० जना स्थायी कमिटी सदस्यले तत्काल पार्टीको स्थायी कमिटी बैठक बोलाउन माग गर्दै अध्यक्षद्धयलाई मागपत्र बुझाएका थिए ।

कोरोना भाइरसको माहामारीका बेला एकजुट भई लड्ने बेलामा राजनीतिक दललाई नै कमजोर बनाउने गरी अध्यादेश ल्याएको भन्दै स्थायी कमिटी बैठक बसेर त्यसपछि केन्द्रीय कमिटी बैठक बोलाउन उनीहरुको माग छ ।

वैशाख २० गतेको सचिवालय बैठकले आजका लागि स्थायी कमिटी बोलाउने निर्णय गरेको थियो । त्यसको एजेण्डा तय गर्न बुधबार साँझ सचिवालय बैठक डाकिएको थियो ।

बुधबारको सचिवालय बैठकमा शीर्ष नेताहरुबीच कुरा मिल्न नसक्दा स्थायी कमिटी बैठक अन्यौल बनेको छ ।