सांसद डा.सुरेन्द्र यादवले सरकारी वकिलकाे कार्यालयमा अपहरणको जाहेरी दिने, विपक्षी दलको पनि साथ

काठमाडौं – जनता समाजवादीका सांसद डा. सुरेन्द्र यादवले जिल्ला सरकारी वकिल कार्यालय काठमाडौंमा अपहरणको जाहेरी दिने भएका छन् । प्रहरीले दर्ता गर्न नमानेपछि उनले कानुन व्यवसायीको रायअनुसार मंगलबार सरकारी वकिल कार्यालयमा गएर उजुरी दिन लागेका हुन् ।

नेकपाका सांसदद्वय महेश बस्नेत, किसान श्रेष्ठ तथा पूर्वप्रहरी महानिरीक्षक सर्वेन्द्र खनालविरुद्ध किटानी जाहेरी लिएर सांसद यादव तथा जनता समाजवादीका शीर्ष नेताहरू आइतबार महानगरीय प्रहरी परिसर काठमाडौं पुगेको भएपनि प्रहरीले जाहेरी लिन मानेन । प्रहरीले घटना महोत्तरीमा भएको भन्दै जाहेरी लिन अस्वीकार गरेको थियो ।

तत्कालीन समाजवादी पार्टी फुटाउने उद्देश्यले पूर्वप्रहरी महानिरीक्षक खनालमार्फत डा.यादवलाई फकाएर काठमाडौं ल्याउन सांसदको टोली बुधबार बिहान महोत्तरी पुगेको थियो ।

प्रलोभन र दबाबमा पारेर आफूलाई काठमाडौं ल्याएको र म्यारियट होटेलमा राखिएको उनको जाहेरीमा उल्लेख छ ।

कांग्रेस, जनता समाजवादी पार्टी नेपाल तथा राप्रपाले सांसद डा.सुरेन्द्र यादवलाई अपहरण गरी महोत्तरीबाट काठमाडौंसम्म ल्याएको घटनाप्रति आपत्ति जनाएका छन् । पार्टी फुटाउने उद्देश्यअनुरूप सरकारले नै सांसद यादवलाई काठमाडौंसम्म ल्याएको विपक्षी दलहरूको ठहर छ ।

कांग्रेसको अगुवाइमा सोमबार बसेको विपक्षी तीन दलको बैठकले राजनीतिक दलसम्बन्धी अध्यादेश फिर्ता लिए पनि पार्टी फुटाउन सांसद अपहरण गर्ने, संविधान र लोकतान्त्रिक प्रणालीमाथि नै प्रहार गर्दै अधिनायकवादी बाटोमा सरकार अग्रसर भएको भन्दै सरकारविरुद्ध संघर्ष गर्ने चेतावनी दिएका छन् ।