बाबुराम विरुद्धको उजुरी लिन प्रहरीद्वारा अस्विकार

काठमाडौँ-सत्तारुढ दल नेपाल कम्युनिष्ट पार्टी (नेकपा)को दुई संगठनले डा. बाबुराम भट्टराई, हिशिला यामी, आङ्काजी शेर्पा र विश्वदिप पाण्डेविरुद्धको उजुरी लिन अस्विकार गरेको छ ।

सोमबार काठमाडौँ प्रहरी परिसर टेकूले अनेरास्ववियूका नेता नारायण घर्ती तथा राष्ट्रिय युवा संघका नेता सञ्जिव कुमार झाद्वारा संयुक्त रुपमा दिईएको उजुरी लिन मानेन । नेकपाका केन्द्रीय सदस्य तथा प्रतिनिधिसभाका सांसद महेश बस्नेत, सांसद किसान श्रेष्ठ तथा पूर्वआइजीपी सर्वेन्द्र खनाललाई अपहरणको झुटा आरोप लगाई सामाजिक सञ्जालमा कुप्रचार गरी सामाजिक सञ्जालको चरम दुरुपयोग गरेको भन्दै दुई संगठनले साइवर क्राईम अपराध सम्बन्धी उजुरी दर्ता गर्न अस्विकार गरेको छ ।

प्रधानमन्त्री जस्तो गरिमामय पदमाथि उच्चपदस्थ व्यत्तिहरुबाटै गम्भीर आरोप लगाएकाले उजुरी दर्ता गर्न गएको युवा तथा विद्यार्थी नेताले जनाएका छन् । प्रहरीले मानमर्दन तथा राजनीतिक मुद्दा भएकाले दर्ता गर्न नमानेको बताइएको छ ।

प्रहरीले उजुरी दर्ता गर्न नमानेकाले कानुन जानकारहरुसँग छलफल गरेर थप रणनीति तय गर्ने उल्लेख गर्दै छलफलपछि थप निर्णय लिने दुवै संगठनका नेतृत्वले जनाएका छन् । लकडाउनमा धेरै भीडभाड हुने भएकाले सरकारको निर्णयलाई शिराधार्य गर्ने उद्देश्यका साथ फर्किएको बताइएको छ ।

उजुरी दर्ता गर्न अनेरास्ववियूका सांयोजक ऐन महर, राष्ट्रिय युवा संघका सहसंयोजक रमेश पौडेल, वरिष्ठ नेता किरण पौडेल, रमेश आचार्य, क्षितिज थेवे, रामजी सापकोटा, अशोक चौलागाईलगायतका नेतृत्वहरुको उपस्थिती रहेको थियो ।