लोकतन्त्रलाई कमजोर बनाउने काम भए कांग्रेस प्रतिकारमा उत्रने

काठमाण्डौ-नेपाली कांग्रेसले संविधान र लोकतन्त्रलाई कमजोर बनाउने काम कहीँ कतैबाट भए प्रतिकारमा उत्रने चेतावनी दिएको छ।

प्रतिनिधिसभा बैठकमा कांग्रेस संसदीय दलकी सचेतक पुष्पा भुसालले लोकतन्त्रलाई कमजोर पार्ने गरि संबैधानिक अंगबाट काम भए कांग्रेस चुप लागेन नबस्ने बताईन। अख्तियार दुरुपयोग अनुसन्धान आयोगले सरकार र राजनीतिक पुर्वाग्रहमा परेर माघ २२ गते कांग्रेसका उपसभापति एवं संसदीय दलका उपनेता बिजयकुमार गच्छदारविरुद्ध मुद्दा दायर गरेको र यसको पुष्टी सरकार आफैंले गरेको भुषालको भनाई छ।

संवैधानिक निकाय सन्तुलनमा रहनुपर्ने धारणा राख्दै सांसद भुसालले लोकतान्त्रिक पद्धति, संसदीय पद्धतिका लागि पार्टीका संस्थापक बिपी कोइरालाले ८ वटा राजद्रोहको मुद्दा पनि देशमै आएर संवैधानिक रुपमा लडेको इतिहास स्मरण गर्दै कानूनी लडाइँ लड्ने बताईन। “संवैधानिक अङ्गले संविधानवादको विपरीत काम गर्छ भने संसद्ले त्यसको प्रतिवाद गर्नुपर्छ, बालुवाटारको जग्गाको विवरण तयार पारी पठाउनु भनी भौतिक योजना मन्त्रालयमा प्रधानमन्त्री कार्यालयको पत्र अहिले पनि छ, यसको प्रक्रिया अघि बढाउन मुख्यसचिवले उपयुक्त ठानेर प्रस्ताव तयार पारेकामा आदेश दिने र प्रस्ताव तयार पार्नेलाई मुद्दा चलाउनु नपर्ने ?” सांसद भुसालले भनेकी छिन्।

यसअघि नेपाली कांग्रेसको संसदीय दलको बैठकले आफ्ना भनाई राख्दै प्रातिनिधिसभाको बैठकमा अवरोध नगर्ने निर्णय गरेको थियो। कांग्रेसको हिजोको केन्द्रीय समिति बैठकले राजनीतिक र कानूनी लडाई एकसाथ लड्ने निर्णय गरेको थियो।