नवनियुक्त बेलायती राजदूत पोलिट र पुष्पकमल दाहाल ‘प्रचण्ड’ बीच शिष्टाचार भेटवार्ता

काठमाण्डौ-नेपाल कम्युनिष्ट पार्टीका अध्यक्ष पुष्पकमल दाहाल ‘प्रचण्ड’सँग नेपालका लागि संयुक्त अधिराज्यका( बेलायत) नवनियुक्त राजदूत निकोला पोलिटले शिष्टाचार भेटवार्ता गरेका छन्।

आज बिहान प्रचण्डलाई भेट्न पोलिट उनको निवास खुमलटार पुगेकी थिइन्। भेटवार्तामा दुई देशको सम्बन्ध, नेपाली राजनीति, आर्थिक विकास र नेपालको शान्ति प्रक्रियाका बारेमा छलफल भएको प्रचण्डको निजी सचिवालयले जनाएको छ।

खुमलटारमा भएको भेटवार्तामा दुई देश बीचको आपसी हितका विषयमा कुराकानी भएको बताइएको छ। सो अवसरमा पूर्वप्रधानमन्त्री प्रचण्डले नेपालको विकासमा बेलायतले गर्दै आएको सहयोगप्रति धन्यवाद दिएको अध्यक्ष पुष्पकमल दाहालको निजी सचिवालयले जनाएको छ। निकोला पोलिटको कार्यकालमा नेपाल र बेलायतको सम्बन्ध अझै प्रगाढ रहने विश्वास लिएको र नेपालको आर्थिक समृद्धिको अभियानमा रहेको, देशको आर्थिक समृद्धिमा बेलायतको सहयोग अपरिहार्य रहेको पूर्व प्रधानमन्त्री प्रचण्डले बताएका थिए।

भेटमा बेलायती राजदूत निकोलाले आफू २० वर्ष पहिले शोधकर्ताका रूपमा नेपाल आएको र अन्नपूर्ण रूटमा ट्रेकिङ गरेको स्मरण गरेकी थिइन्।

बेलायती राजदूत पोलिटले आगामी दिनमा नेपालको विकासमा बेलायत सरकारको सहयोग जारी रहने बताएकि छिन।