प्रदेश तीनको राजधानी विवादः आवश्यकता खोज्ने की बीच भाग रोज्ने ?

काठमाडौं- प्रदेश ३ को राजधानी र नामाकरणका विषयमा लामो समयदेखि बहस चलेपनि सहमतिको अन्तिम विन्दुमा भने पुग्न सकिएको छैन ।

नाम र राजधानीका विषयमा बिहीबारको प्रदेश सभा बैठकमा पनि निक्कै रस्साकस्सी चल्यो । बैठकमा सांसदहरुले राजधानी कहाँ राख्ने भन्ने विषयमा आ–आफ्नै तर्क प्रस्तुत गरेका छन् ।

सांसद रवीन प्रसाद पाण्डेले संविधानले दिएको विशेष अधिकार अनुसार प्रदेशले राजधानी र नाम तोक्न आग्रह गरे । उनले भौगोलिक सुगमता, औचित्य सामर्थ, सबै दृष्ठिकोणले १३ जिल्लामध्ये ३२ लाख जनखंख्या बसोबास गर्ने क्षेत्रले काभ्रे र १३ लाख जनसंख्याले हेटौडालाई नजिक ठान्ने बताए ।

भौगोलिक सुगमता र सिंहदरबारको शासन जनताको विचमा ल्याउन काभ्रे उपयुक्त हुने उनको तर्क थियो ।

तर, सांसद प्रेमबहादुर पुलामीले भने तत्कालिन प्रधानमन्त्री शेरबहादुर देउवाले राजनीतिक सहमतिमा हेटौंडा राजधानी तोकेकाले त्यसलाई नै निर्णयमा पुर्याउनुपर्ने बताए ।

सांसद केशवराज पाण्डे भने नुवाकोट प्रदेशको राजधानी बनाउनुपर्ने पक्षमा छन् ।

सांसद ओमबहादुर घलानले राजधानीका लागि बीचभाग खोज्ने कि महत्वपूर्ण भाग खोज्ने ? भन्दै प्रश्न गरे । मकवानपुर भनेको सबै भन्दा बढी जातिको बसोबास भएको जिल्ला रहेको र सबैले हेटौंडालाई नै मन पराएकाले हेटौडा नै राजधानी हुनुपर्ने उनले बताए ।

सांसद राजेन्द्र गुरुङले काभ्रेलाई प्रदेश राजधानी तोक्नुपर्ने बताईरहदा सांसद विजुला बर्मा राना काभ्रेमा धेरै जनसंख्याको पायक पर्ने भएकाले काभ्रेलाई नै राजधानी तोक्नुपर्ने बताउछन् ।

यसअघि नेकपाको केन्द्रीय सचिवालय बैठकले प्रदेशको राजधानी हेटौंडा कायम गर्न र नाम बागमति राख्न भनेको थियो । प्रदेशको अधिकारलाई केन्द्रले हस्तक्षेप गरेको भन्दै नेकपाकै केही सांसदले यसको विरोध गरेका थिए ।

प्रदेशको नामबारे त्यति धेरै विवाद नरहेपनि राजधानीबारे भने गहन छलफल गनुपर्ने सांसदहरुको जोड छ ।

प्रदेश सभा बैठक शुक्रबार दिउसो ३ बजेका लागि फेरी बोलाईएको छ ।