एकता टुंगिएसँगै नेकपाकाे भ्रातृ संस्था अनेरास्ववियुमा विवाद चुलियाे

काठमाडाैं-सत्तारुढ दल नेपाल कम्युनिस्ट पार्टी (नेकपा) को भ्रातृ संगठन अखिल नेपाल स्वतन्त्र विद्यार्थी युनियन (अनेरास्ववियु) मा विवाद भएको छ ।

नेकपाले गत ३ जेठमा भ्रातृ संगठनको संयोजक र उपसंयोजक तोकेको थियो । संगठनको नेतृत्व पाएको लामो समयपछि शुक्रबार दुवै संगठनबीच एकता भएको सामाजिक संजालद्वारा सार्वजनिक भएपछि विवाद बाहिरिएको छ ।

शुक्रबार करिब १० बजेर ४० मिनेटमा सामाजिक सञ्जालमा सार्वजनिक गरेका थिए, संयोजक ऐन महर र सहसंयोजक रञ्जित तामाङले । केन्द्रीय सदस्य र विभाग सदस्यका नाम सार्वजनिक गरेपछि तत्कालीन नेकपा माओवादीनिकट अखिल क्रान्तिकारीबीच विवाद बढेको छ ।

तत्कालीन अखिल क्रान्तिकारीका असन्तुष्ट नेताहरूले वक्तव्य नै जारी गरेका छन् । असन्तुष्ट पक्षले १८ गते एकतापश्चातको केन्द्रीय समिति र आयोगहरूको विवारण एकाएक सञ्चारमाध्यमहरूमा आयो ।

वक्तव्यमा भनेका छन्, ‘हाम्रो संगठन अखिल (क्रान्तिकारी) को तर्फबाट नयाँ केन्द्रीय समितिमा समावेश नाम अन्यायपूर्ण, एकलौटी र चरम गुटगत मानसिकताका आधारमा गरेको हाम्रो ठहर छ ।’

वक्तव्यमा २१औं राष्ट्रिय सम्मेलनमा भएको निर्वाचनको मनोविज्ञानलाई आधार बनाएर नयाँ समितिका सहसंयोजकले अगाडि बढाएको आरोप लगाएको छ ।

क्रान्तिकारी २१औं राष्ट्रिय सम्मेलनमा प्यानल घोषणा गरेर निर्वाचनमा होमिएको थियो । तर, तत्कालीन क्रान्तिकारीका अध्यक्ष रञ्जित तामाङले आफूले कार्यदलको सिफारिसअनुसार केन्द्रीय सदस्य बनाएको दाबी गरे ।

उनले भने, ‘एकताका लागि कार्यदल बनाएको थियो । कार्यदलले दिएको सल्लाह सुझावअनुसार नै केन्द्रीय सदस्यहरू छनाेट भएका हुन् । म अहिले साथीहरूले राखेको असन्तुष्टिबारे छलफलमा छु । छलफलपछि यसबारेमा बोल्नेछु ।’

उता असन्तुष्ट पक्ष भने बिदाइ गरेका ८८ जनामा केही साथीहरू सिनियर भएर पनि नाम छुटाएकाले उनीहरूको नाम थप्नुपर्ने अडानमा रहेका छन् ।

क्रान्तिकारीका तत्कालीन उपाध्यक्ष दिपक देवकोटा भन्छन्, ‘कयौं सिनियर साथीहरू छुटेका छन् । तीनको व्यवस्थापन हुनुपर्छ । बसेर छलफल गरेर जानुपर्छ ।’

उनले भने, ‘कैयौं जुनियर साथीहरू केन्द्रीय समितिमा पर्दा सिनियर साथीहरू छुटेका छन् । सिनियर साथीहरूको व्यवस्थापन हुनुपर्छ । अध्यक्ष प्रचण्डले पनि बसेर छलफल गरेर हल गर्ने आश्वासन दिनुभएको छ ।’

तत्कालीन एमालेनिकट अखिलमा विवाद भए पनि बाहिर आएको छैन । तर, क्रान्तिकारीमा भएको विवाद भने बाहिर आएको छ । सचिवमा विजयी भएका व्यक्ति पनि केन्द्रीय सदस्यमा नपरेपछि झन् विवाद बढेको छ ।