राष्ट्रियसभा सदस्य चयनकाे निर्वाचन कार्यतालिका प्रकाशन,मतदान माघ ९ मा

काठमाडाैं-निर्वाचन आयोगले आगामी ९ माघमा राष्ट्रियसभाका १८ सदस्यको चयनका लागि हुने निर्वाचनको कार्यतालिका प्रकाशन गरेको छ ।

आयोगले मंगलबार सार्वजनिक गरेको निर्वाचनको कार्यतालिकाअनुसार मतदाता नामावली प्रकाशन १७ पुसमा बिहान १० देखि ११ बजेसम्म र नामावली उपर दाबी विरोधको उजुरी सोही दिन बिहान ११ देखि ४ बजेसम्म तोकेको छ ।

आयोगका अनुसार मतदाता नामावली उपर परेको उजुरीको छानबिन गरी अन्तिम नामावली प्रकाशन १८ देखि १९ गते पुसमा बिहान १० बजेदेखि दिउँसो ४ बजेसम्म तोकेको छ भने उम्मेदवारको मनोनयनपत्र दर्ता २० पुसमा बिहान १० बजेदेखि ३ बजेसम्म तथा उम्मेदवारको सूची प्रकाशन सोही दिन ३ बजेदेखि ४ बजेसम्म निर्धारण गरेको छ ।

आयोगका अनुसार उम्मेदवारको विरोधमा उजुरी २१ पुसको बिहान १० देखि अपराह्न ४ बजेसम्म, मनोनयनपत्र र उजुरी उपर जाँचबुझ गरी निर्णय २२ पुसमा बिहान १० देखि अपराह्न ४ बजेसम्म गर्ने र उम्मेदवारको नामावली प्रकाशन २३ पुसमा बिहान १० देखि अपराह्न ४ बजेसम्म गर्ने भएको छ ।

उम्मेदवारले नाम फिर्ता लिन २४ पुसमा बिहान १० देखि अपराह्न ४ बजेसम्म, उम्मेदवारको अन्तिम नामावली प्रकाशन २५ पुसमा बिहान १० देखि अपराह्न ४ बजेसम्म र उम्मेदवारलाई निर्वाचन चिह्न प्रदान सोही दिन अपराह्न १ देखि ४ बजेसम्म गरिने भएको छ ।

आयोगले मतदान गर्न ९ माघमा बिहान १० देखि अपराह्न ४ बजेसम्म निर्धारण गरेको छ भने मतगणना सोही दिन अपराह्न ४ बजेपछि सुरु गरिने जनाएको छ ।