कांग्रेस भित्रकाे विवादकाे चुराे के?

काठमाडाैं-नेपाली कांग्रेसको संस्थापन पक्ष र असन्तुष्ट पक्षबीच चुलिएको विवादको मुख्य चुरो पार्टीको महाधिवेशनको मिति चार महिना फरक पारेर प्रस्ताव गर्नु रहेको खुलेको छ ।

पार्टी संस्थापन पक्ष र असन्तुष्ट पक्षबीच आइतबार पार्टी पूर्वमहामन्त्री प्रकाशमान सिंहको निवास चाक्सीबारीमा भएको करिब चार घण्टा लामो छलफलमा आगामी १४औं महाधिवेशनको मिति प्रस्ताव चार महिना फरक हुँदा सहमति हुन सकेन ।

पार्टी संस्थापन पक्षले २६ मंसिरमा सुरु भएको पार्टी केन्द्रीय कार्यसमिति बैठकमा पेश गरेको एजेण्डामा आगामी महाधिवेशनको कार्यतालिका पेश नगरेको भन्दै नेता रामचन्द्र पौडेल पक्षधर असन्तुष्ट नेताले बैठक बहिष्कार गर्दै आएका थिए ।

पार्टी केन्द्रीय कार्यसमिति बैठकमा भाग लिने र बहिष्कार गर्नेमा विभाजित भएपछि पार्टी सभापति शेरबहादुर देउवाले उपसभापति विमलेन्द्र निधिलाई असन्तुष्ट पक्षसँग वार्ता गर्ने जिम्मेवारी दिएका थिए ।

असन्तुष्ट पक्षको तर्फबाट नेता सिंहको संयोजकत्वमा केन्द्रीय सदस्य दिलेन्द्र प्रसाद बडू र हृदयराम थानी सदस्य रहेको टोली र निधिबीच आइतबार चाक्सिबारीमा भएको वार्ता महाधिवेशनको मितिलाई लिएर अड्किएको थियो ।

स्रोतका अनुसार असन्तुष्ट पक्षले महाधिवेशनको कार्यतालिका प्रस्तुत गर्दा ५/८ मंसिर, २०७७ प्रस्ताव गरेका छन् । तर निधिले कार्यतालिकाबमोजिम फागुन २०७७ मा महाधिवेशन गर्दा उपयुक्त हुने प्रस्ताव गरेका थिए ।

पौडेल पक्षका सहभागीले पेश गरेको मिति उपयुक्त नहुने भन्दै निधिले फागुन महिना मौसम र तयारीको हिसाबले पनि उपयुक्त भएको जनाउँदै फागुनबाट महाधिवेशन नसर्ने गरी तयारी गरिने प्रतिवद्धता जनाएको बैठकमा सहभागी थानीले बताए ।

असन्तुष्ट पक्षले भने फागुनमा कुनै कारण वा काबुबाहिरको स्थिति आएमा विधानलाई परिवर्तन गर्नुपर्ने स्थिति नआओस् भन्ने चाहना रहेको बताएको थियो ।