कांग्रेसमा हिस्सेदारीमा कुरा मिलेन

काठमाडाैं-नेपाली कांग्रेसका दुवैपक्षीय नेताहरू पार्टीको १४ औं महाधिवेशनको कार्यतालिका तय गरेर जान सहमत देखिएका छन्। महाधिवेशनको कार्यतालिकाको अजेन्डा बैठकमा नआएको भन्दै असन्तुष्ट पक्षले केन्द्रीय समिति बैठक बहिष्कार गरेपछि संस्थापन पक्ष महाधिवेशनको तालिका बनाएर अघि बढ्न तयार भएको हो।

विधानले दिएको चार वर्षे कार्यकाल आगामी फागुनमा सकिन लागे पनि एक वर्ष कार्यकाल थप गर्न सहमत दुवै पक्षबीच १४ औं महाधिवेशन मंसिर वा फागुन कहिले गर्ने भन्नेमा सहमति जुट्न बाँकी छ। संस्थापनले फागुनमा र असन्तुष्टले मंसिरमा महाधिवेशन गर्नुपर्ने प्रस्ताव अघि सारेका छन्। तर असन्तुष्ट पक्ष संस्थापनको प्रस्तावअनुसार नै फागुनमा महाधिवेशन गर्नेगरी अघि बढ्न सकारात्मक देखिएको छ।

‘एक वर्ष कार्यकाल थप गर्ने र फागुनको पहिलो वा दोस्रो )२०७७ फागुन) साता महाधिवेशन गर्ने र त्यसअघि समायोजन, क्रियाशील सदस्यता नवीकरण, वितरणका साथै सबै तहको अधिवेशनको कार्यतालिका बनाएर जाने सैद्धान्तिक सहमति बनेको छ,’ छलफलमा सहभागी एक नेताले भने, ‘हामी (असन्तुष्ट पक्ष) सहभागी हुने केन्द्रीय समितिबाट महाधिवेशनको कार्यतालिका पारित गरेर जाने कुरामा सकारात्मक छलफल भएको छ। तिथि, मिति ठूलो कुरा होइन मिल्छ।’

पार्टीका विभाग थप गर्नै नहुने अडानमा रहेको असन्तुष्ट पक्ष संख्या बढाउन सकारात्मक देखिएको हो । केन्द्रीय समितिमा पेस भएकै प्रस्तावअनुसार अघि बढ्न दुवै पक्ष तयार भए पनि पाउने विभागका विषयमा सहमति जुट्न बाँकी छ।

संस्थापन पक्षले संगठन, जनसम्पर्क, महिला, विद्यार्थी, परराष्ट्र विभाग आफूसँग राख्ने प्रस्ताव गरेको छ। तर, असन्तुष्ट पक्षले त्यसलाई पनि मिलाएर जानुपर्ने धारणा राख्दै आए पनि संस्थापन पक्षले विभागका सचिवसहित अन्य सदस्य मिलाएर जाने प्रस्ताव राख्दै आएको छ।