नेकपाले वामदेवलाई उपाध्यक्ष बनाउने बाटाे बनायाे

काठमाडाैं-सत्तारुढ नेपाल कम्युनिस्ट पार्टी (नेकपा)ले बामदेव गौतमलाई उपाध्यक्ष बनाउन विधान संशोधन गर्ने भएको छ । सोमबार पार्टी केन्द्रीय कार्यालय धुम्बाराहीमा बसेको नेकपा सचिवालय बैठकले पार्टीमा उपाध्यक्ष रहने व्यवस्थासहित विधान संशोधनको प्रस्ताव पारित गरेको हो । 

आगामी स्थायी कमिटीबाट अनुमोदन गराउने गरी विधान संशोधन प्रस्ताव पारित गरिएको सो पार्टीका प्रवक्ता नारायणकाजी श्रेष्ठले जानकारी दिए । सचिवालयले २९ मंसिरमा बस्ने गरी स्थायी कमिटी बैठक बोलाएको छ ।

यसअघि नेकपा सचिवालयले नेता गौतमलाई उपाध्यक्ष बनाउने प्रस्ताव गरेको थियो । तर, स्थायी कमिटी बैठक नबसेकाले यो प्रस्ताव अनुमोदन भएको छैन ।

पार्टीमा उपत्यका विशेष समन्वय कमिटी र विशेष कमिटीहरूको व्यवस्था गर्ने वैधानिक प्रावधान पनि विधानमा व्यवस्था थपिएकाे छ ।

सचिवालय बैठकले संगठन विभाग प्रमुख गौतमले पेस गरेको संगठनात्मक कार्ययोजना भने पारित गरेन । आवश्यक परामर्शपछि अर्को बैठकबाट पारित गर्ने निर्णय भएको पार्टी प्रवक्ता श्रेष्ठले बताए ।

नेता गौतमको कार्ययोजनामा तत्कालीन एमालेका ५ लाख तथा माओवादी केन्द्रका ३ लाखसहित करिब ८ लाख सदस्यलाई नयाँ सदस्यताका रूपमा परिवर्तन गर्ने उल्लेख छ ।

प्रस्ताव पेस गर्न निर्देशन

सचिवालय बैठकले केन्द्रीय आयोग र विभागलाई पूर्णता दिन सम्बन्धित प्रमुख र उपप्रमुखलाई सात दिनभित्र महासचिव विष्णु पौडेलसमक्ष प्रस्ताव पेस गर्न निर्देशन पनि दिएको छ ।

‘सबै आयोग र विभागहरूका प्रमुख र उपप्रमुखले प्रस्ताव पेस गरेपछि आगामी सचिवालय बैठकले छलफल गरेर पूर्णता दिने निर्णय भएको छ,’ उनले भने ।

प्रतिवेदन पठाउन पाँच दिन थप

अध्यक्ष पुष्पकमल दाहाल ‘प्रचण्ड’को अध्यक्षतामा बसेको बैठकले समीक्षाका लागि उपनिर्वाचन भएका क्षेत्रका पार्टी कमिटीलाई प्रतिवेदन पठाउन पाँच दिनको समय थप गरिदिएको छ ।

केन्द्रीय संगठनलाई जिम्मेवारी

विभिन्न जिल्लामा देखिएका संगठनात्मक समस्या समाधान गर्ने जिम्मेवारी केन्द्रीय संगठन विभागलाई दिएको छ ।

काममा फर्किन निर्देशन 

बैठकले कर्णाली प्रदेशका सचिव मायाप्रसाद शर्माले दिएको राजीनामा अस्वीकार गर्दै पूर्ववत् काममा फर्किन निर्देशन दिएको छ ।