भरतपुर महानगरपालिका–१६ नेकपाले हार्दा प्रचण्डलाई धक्का

काठमाडाैं-२०७६ साल मंसिर १४ गते सम्पन्न भएको उपनिर्वाचन २०७६ मा संघीय संसद, प्रदेश र स्थानीय तहका बहुसंख्यक पदमा नेपाल कम्युनिस्ट पार्टी (नेकपा) ले विजयी हासिल गर्दैगर्दा भरतपुर महानगरपालिका–१६ मा भने हार ब्येहोर्नुपरेको घटना चर्चाको विषय बनेको छ ।

चितवन जिल्ला नेकपाका अध्यक्ष पुष्पकमल दाहाल ‘प्रचण्ड’ को गृहजिल्ला हो । तर चितवनमा नेकपाले गुमाएको छ । चितवनको भरतपुर महानगरपालिका–१६ र खैरहनी नगरपालिका–४ र ५ को वडा अध्यक्षको निर्वाचनमा नेपाली कांग्रेसका उम्मेदवारले विजयी हासिल गरेका छन् ।

२०७४ को स्थानीय तहको निर्वाचनमा ती वडामा पूर्व नेकपा एमालेले जितेको थियो । चितवनजस्तो राजनीतिक रुपमा सचेत जनमत भएको जिल्लामा नेकपाले हार ब्येहोर्नुलाई अर्थपूर्ण रुपमा लिइएको छ ।वास्तवमा परिणामलाई प्रचण्ड र उनकी छोरी रेणुको कार्यशैली र व्यवहारलाई मतदाताहरुले अनुमोदन नगरेको रुपमा विश्लेषण गरिदैछ ।

यस परिणामलाई कांग्रेसको जित र नेकपाको हारका रुपमा नभई प्रचण्ड र रेणु दाहालहरुको अहम र दम्भको परिणामको उपज हो भन्ने धेरैको मत रहेको पाइन्छ ।पार्टी एकतापछि नेकपाको विजय झन सुनिश्चित हुनुपर्नेमा उल्टो परिणाम आउँदा यसबारे गम्भीरतापूर्वक समीक्षा गर्नुपर्ने परिस्थिति नेकपाका लागि आएको छ ।

स्वयम् प्रचण्डका लागि भविष्यको संसदीय राजनीतिमा गम्भीर खतरा र संकटको पूर्व संकेत त हुँदै हो । यसबाट समयमै पाठ सिकेर अघि बढ्न प्रचण्डलाई शिक्षाका रुपमा समेत यस परिणामलाई हेर्नुपर्ने टिप्पणी समेत गर्न थालिएको छ ।