कांग्रेसकाे भ्रातृ संस्था भंग हुने क्रम राेकिएन,तरूण दल पनि भंग

 काठमाडाैं-नेपाली कांग्रेसको भ्रातृसंस्था नेपाल तरुण दलको चाैथाे महाधिवेशनबाट आएको केन्द्रीय समितिको कार्यकाल सकिएसँगै साेमबारबाट स्वतः भंग भएको छ ।

२७ देखि ३० कात्तिक, २०७३ मा पोखरामा भएको तरुण दलको तेस्राे महाधिवेशनले जीतजंग बस्नेतको नेतृत्वमा चार सदस्यीय केन्द्रीय समिति चयन गरेको थियो । निर्धारित मितिमा महाधिवेशन नसकिएपछि २ मंसिर २०७३ मा बस्नेतको नेतृत्वमा तरुण दल केन्द्रीय समिति घोषणा गरिएको थियो ।

तरुण दलको विधानले संगठनको कार्यकाल ३ वर्ष हुने व्यवस्था गरेको छ भने नेपाली कांग्रेसको विधानमा कार्यकाल समाप्त भएका भ्रातृ संस्थाले निर्धारित समयमा महाधिवेशन गर्न नसके स्वतः भंग हुने व्यवस्था छ ।

तरुण दलको ३ वर्षे कार्यकालमा ९५ सदस्यीय केन्द्रीय कार्यसमिति हुनुपर्नेमा ९१ जना पदाधिकारी र सदस्यको चयन नगरी बस्नेत नेतृत्वको तरुण दलको कार्यकाल समाप्त भएको हो ।

चार सदस्यीय तरुण दल केन्द्रीय कार्यसमितिको उपाध्यक्षमा उत्तम चापागाईं, महासचिवमा भूपेन्द्रजंग शाही र कोषाध्यक्षमा विद्वान गुरुङ थिए । गत भदौमा पार्टीले संचालन गरेको राष्ट्रिय जागरण अभियानको कार्यक्रमलाई लिएर असन्तुष्टि व्यक्त गरेका महासचिव भूपेन्द्रजंग शाही कारबाहीमा परेका थिए ।

तरुण दल अध्यक्ष बस्नेतद्वारा शाहीलाई संगठनको साधारण सदस्यबाट हटाएको एक घण्टा पनि नबित्दै शाहीले पनि अध्यक्ष बस्नेतलाई कारबाही गरेको जानकारी सामाजिक सञ्जालमा सार्वजनिक गरेका थिए ।

तरुण दलका महासचिव शाहीले आफ्नो कार्यकालमा भ्रस्टाचारविरुद्ध भ्रष्टाचार मुक्त नेपाल, १० हजार युवालाई स्वरोजगार बनाउन उद्यमशीलता, ‘एक घर एक तरुण’ अभियान प्रस्ताव गरेर पनि सञ्चालन हुन नसकेको जनाएका छन् ।