अझै मिलेन, प्रचण्ड-ओलीको मन

काठमाडौं-एक समय एकअर्काका कटु आलोचक बनेका केपी शर्मा ओली र पुष्पकमल दाहाल अहिले नेकपाका अध्यक्ष छन्।

उनीहरुकै भाषामा एउटा जेटका दुई पाइलट। सरकारको समेत नेतृत्व गरिरहको पार्टीका यी दुई अध्यक्ष बीच हरेक दिनजसो भेटघाट हुन्छ।

सरकार, पार्टी र अन्य महत्वपूर्ण विषयमा छलफल हुन्छ। तैपनि उनीहरुबीच विश्वासको वातावरण बन्न सकेको छैन |

तत्कालिन एमाले र माओवादी केन्द्रबीच एकता भएको १७ महिना तथा ओलीको नेतृत्वमा सरकार गठन भएको २० महिना भइसक्दासमेत यी दुई नेताको मन र मत मिल्न नसकेकै कारण केही महत्वपूर्ण निर्णयमा ढिलाई हुने गरेको छ।

दुई अध्यक्षबीच पटकपटक घन्टौँ वार्ता हुँदा पनि धेरै विषयमा कुरा मिल्न नसकेको आजको कान्तिपुरले समाचार छापेको छ |

समाचार अनुसार पछिल्लोपटक मन्त्रिपरिषद हेरफेर, सभामुख चयन, स्थायी कमिटी बैठक आह्वान, संवैधानिक र द्वन्द्वकालिन न्यायसम्बन्धी आयोगहरुमा पदाधिकारी नियुक्तिका विषयमा उनीहरुबीच सहमति जुटेको छैन।

‘दुई अध्क्षबीच पटकपटक लामो कुराकानी हुन्छ, तर के विषयमा कुरा गर्नुहुन्छ, त्यो सबै हामीलाई भन्नुहुन्न,’ महासचिव विष्णु पौडेलले भने, ‘पार्टी र सरकारका कामलाई कसरी प्रभावकारी बनाउने भन्ने विषयमा कुराकानी गर्नुहुन्छ होला।’

यति धेरै वार्ता भइरहँदा पनि उनीहरुबीच बेला बेला सार्वजनिक रुपमै विवाद र असन्तुष्टि देखिने गरेको छ।