चर्चामा रहेका उम्मेदवारलाई पछि पार्दै कास्की २ काे टिकट पाउने पाैडेल काे हुन्?

काठमाडाैं-उमेरले पाका खेमराज पौडेल कांग्रेस संस्थापक नेता बीपी कोइरालासँगै राजनीति गरेका व्यक्ति पनि हुन्।

कांग्रेसमा लागेर लाभको पदमा नपुगेका उनी कास्कीका सरल नेताका रुपमा परिचित छन्। पौडेललाई यस अघि चुनाव लडेको अनुभव छैन। कांग्रेसीजनहरु उनलाई निष्ठावान जिल्ला नेताका रुपमा चिन्दछन्। कांग्रेसका कास्की जिल्ला सभापति कृष्ण केसी उम्मेदवार पौडेलबारे भन्छन्,‘उहाले टिकट पाउँदा अन्यले चित्त दुखाउँदैनन्। उहाँको जिन्दगीको पहिलो उम्मेदवारी हो।’

संघीय व्यवस्था अघि कास्की २ मा घर रहेका पौडेलको घर हाल कास्कीको निर्वाचन क्षेत्र ३ मा पर्छ। गणेशमान फाउण्डेसन कास्कीका जिल्ला संयोजक रहेका पौडेल पोखरा विश्व विद्यालयका सिनेट सदस्य पनि हुन्।

कांग्रेस राजनीतिमा लामो समयको क्रियाशिलता रहेको देखेर नै पौडेललाई टिकट दिइएको धेरैको आंकलन छ। जिल्ला कार्यसमितिबाट सिफारिसमा परेर टिकटको लागि देउवा निवासमा ढुकिरहेका एक स्थानीय नेता भने उनलाई टिकट दिएको प्रति बेखुसी थिए। पौडेललाई दिएको टिकटले कांग्रेसको पराजय हुने निष्कर्ष सुनाउँदै उनले भने,‘७० कटेको व्यक्तिले चुनाव जित्दैनन्। जित्नेलाई कांग्रेसले टिकट दिदैन।’

अर्को तर्फ चर्चामा रहेर टिकटबाट बन्चित भएका उम्मेदवारका दाबेदार देवराज चालिसेले सह्दयता देखाएका छन्। चालिसेले पौडेललाई ‘आदरयोग्य नेता’ भएको प्रतिक्रिया दिए।

जिल्ला सभापति केसीले उम्मेदवारको टिकट पाएका पौडेलले कांग्रेसबाट टिकट पाएका अन्यले भन्दा कम मत नल्याउने दाबी गरे। सामाजिक आन्दोलनमा लागेर पछिल्लो समय निश्क्रिय रहेका ठुलो संख्याको सहानुभूति पौडेलको पक्षमा देखिने केसीको बुझाई छ। उनले भने,‘निष्ठाका लागि उम्मेदवार प्राप्त भएको छ। उहाँको पक्षमा मत माग्न अझ सहज भएको छ।’

उमेरले बुढ्यौली भएपनि टिकटको दौडमा पौडेलले अन्य १५ जनालाई उछिन्न सफल भए।