१० घन्टा बैठक गरेर पनि कांग्रेसले उम्मेदवार टुंगाे लगाउन सकेन

काठमाडौं-प्रमुख प्रतिपक्षी दल नेपाली कांग्रेसलाई आशन्न उपनिर्वाचनका लागि उम्मेदवारकाे  टुंगो करिब दश घन्टा बसेर पनि लगाउने सकेन। गुटका व्यक्ति हाबी हुँदा टुंगाे लगाउन सकस भएको छ । मंसिर १४ गते हुन लागेको उपनिर्वाचनका लागि पर्सी (बिहीबार) उमेदवारी मनोनयन हुँदैछ । तर, आजसम्म पनि कांग्रेसले मुख्य स्थानहरुमा उमेदवार टुंगो लगाउन सकेको छैन । 

उमेदवार टुंग्याउन मंगलबार बिहान सभापति शेरबहादुर देउवाको निवास बूढानीलकण्ठमा अबेर रातिसम्म् बसिरहेकाे थियाे। बसेको पदाधिकारी बैठक लम्बिएको छ । प्रतिनिधिसभाको एकमात्र रिक्त स्थान कास्की–२ मा कसलाई टिकट दिने भन्नेमा छलफल केन्द्रित भएको बताइएको छ । सोही स्थानका बारेमा नेताहरुबीच सहमति हुन नसक्दा पदाधिकारी बैठक लम्बिएको बताइएकाे थियाे। तर, अन्य स्थानमा पिन विवाद भएकाे बताइएकाे छ। बिहान करिब १० बजेबाट सुरु भएको बैठक १ बजे स्थगित भइ दिउँसाे ३ बजेदेखि बसेकाे थियाे।

कास्की–२ मा केन्द्रीय सदस्य धनराज गुरुङले चाहना राख्दा नेताहरुबिच सहमति हुन नसकेको बताइएको छ । कांग्रेस स्रोतका अनुसार गुरुङ टिकटका लागि अन्तिम प्रयास गर्दैछन् । बैठक स्थलमा उनी पनि उपस्थित रहेर फर्केका थिए। 

त्यसो त कास्की कांग्रेसले उनको नाम केन्द्रमा सिफारिस गरेको छैन । कास्की कांग्रेसले बाहिरी जिल्लाबाट उम्मेदवार बनाए स्विकार नगर्ने यसअघि नै बताइसकेको छ । गुरुङ स्याङ्जाका हुन् । 

प्रवक्ता विश्वप्रकाश शर्माले आजै उमेदवारको टुंगो लाग्ने सम्भावना रहेको बताएका थिए ।