भक्तपुर नेकपाले उपनिर्वाचनमा उम्मेदवारीकाे दाबी गर्ने छ जनाकाे नाम केन्द्रमा पठायाे

काठमाडौं – सत्तारूढ नेपाल कम्युनिस्ट पार्टी (नेकपा)भक्तपुरले जिल्लाको निर्वाचन क्षेत्र नम्बर १ को प्रदेशसभा सदस्यको उपचुनावका लागि ६ जनाको नाम केन्द्रमा पठाएको छ ।

कात्तिक १० गतेसम्म बढीमा तीन जनाको नाम केन्द्रमा पठाउन निर्देशन दिए पनि चारदिन ढिला गरी भक्तपुरले ६ जनाको नाम केन्द्रमा पठाएको छ । जिल्ला कमिटीले पार्टी सचिव देवीप्रसाद ढकाल (डीपी), रमेश बुढाथोकी, मोहनवीर श्रेष्ठ, शम्भु दाहाल, दामोदर दंगाल र रामबहादुर श्रेष्ठलाई सिफारिस गरेको एक नेताले जानकारी दिए ।

भक्तपुर जिल्ला कमिटीले सर्वसम्मत रूपमा नामको टुङ्गो लगाउन नसकेपछि इन्चार्ज दिलीप प्रजापति, सहइन्चार्ज सोमप्रसाद मिश्र, जिल्ला अध्यक्ष वचन देउजा र सचिव डीपी ढकाललाई अख्तियारी दिएको थियो । चारजनाले पनि सर्वसम्मत नाम छान्न नसकेपछि ६ जनाको नाम केन्द्रमा पठाएको हो ।