नेकपाकाे चियापान आज,५० हजार जना उपस्थित हुने दाबी

काठमाडाैं-सत्तारुढ नेपाल कम्युनिष्ट पार्टी (नेकपा) ले बडादसैं, तिहार, नेपाल संवत्, छठलगायत पर्वका अवसरमा आज भृकुटीमण्डपमा चियापान तथा शुभकामना आदान प्रदान कार्यक्रम तय गरेको छ ।

चियापानका लािग पार्टीका अध्यक्षद्वय प्रधानमन्त्री केपी शर्मा ओली र पूर्वप्रधानमन्त्री पुष्पकमल दाहाल (प्रचण्ड)ले १ लाख जनालाई निमन्त्रणा कार्ड पठाएका छन् ।

नेकपा नेता कृष्णगोपाल श्रेष्ठका अनुसार पार्टीले चियापानमा ५० हजार जना उपस्थित हुने आँकलन गर्दै सोहीअनुसारको चिया खाजाको व्यवस्था गरेको छ ।

उनका अनुसार पार्टीका नेता, कार्यकर्ता र सर्वसाधारणले भोलि अपराह्न १२ देखि ३ बजेसम्म चियापानमा सरिक हुनुपर्नेछ भने भीभीआईपी, भीआईपी, कूटनीतिक नियोगका पदाधिकारीलगायतका लागि ३ देखि ५ बजेसम्मको समय मिलाइएको छ ।

चिया र खाजा व्यवस्थापनको जिम्मा आम्रपाली ब्याङ्क्वेटले पाएको छ । जसले उच्च पदस्थ र सर्वसाधारणलाई चिया खाजाको व्यवस्थापन गर्नेछ ।

नेता श्रेष्ठका अनुसार भीआईपीका लागि चियाखाजा कप र प्लेटमा व्यवस्थापन गरिएको छ भने सर्वसाधारण र नेता कार्यकर्ताले प्लास्टिकको कप र प्लेटमा खाजा खान पाउनेछन् । उनका अनुसार नेकपाले शुभकामना आदान प्रदानसँगै पेयका रूपमा चिया कफी बाँड्नेछ भने खाजामा फलफूल लड्डु, बर्फी, निम्की र स्याण्डविच दिनेछ ।