सत्तारूढ दललाई धक्का,कांग्रेस निकट संगठनहरू एकपछि अर्काे विजयी

काठमाडाैं- सत्तारूढ नेपाल कम्युनिस्ट पार्टीलाई एक पछि अर्काे हार बेहाेर्नु परेकाे छ। तीन तहकाे निर्वाचनमा दुइ तिहाइ जितेकाे नेकपाले विभिन्न संगठनमा एक पछि अर्काे हार भाेगेकाे छ।

नेकपालाई शर्मनाक पराजय  नेपाल वैदेशिक रोजगार व्यवसायी सङ्घको निर्वाचनमा बेहाेर्न पर्याे। मङ्गलबार भएको निर्वाचनमा लोकतान्त्रिक समूहले जित हाँसिल गर्यो । काँग्रेस निकट नेपाल लोकतान्त्रिक वैदेशिक रोजगार व्यवसायी फोरमको ‘प्यानल’ नै विजयी भयो । सङ्घको अध्यक्षमा विष्णुप्रसाद गैरे निर्वाचित भए । उनले  कूल ३३० मत प्राप्त गरे ।

प्रधानमन्त्री एवं नेकपा अध्यक्ष केपी शर्मा ओलीको गृहजिल्लामा भएकाे उद्योग वाणिज्य सङ्घ, दमकको निर्वाचनमा नेकपा निकट व्यवसायी प्यानल पराजित भयो । काँग्रेस नेतृत्वको समूहले नेकपा नेतृत्वको व्यवसायीलाई पराजित गरेको थियो । काँग्रेस निकट लोकतान्त्रिक प्यानल उम्मेदवार गोकुल श्रेष्ठले प्रगतिशील प्यानलका विमल खतिवडालाई पराजित गरे । 

ट्रेकिङ एजेन्सि एसोसिएसन अफ नेपाल (टान) को ४१औँ वार्षिक साधारणसभामा तथा नयाँ नेतृत्वका लागि भएको निर्वाचनमा नेकपा निकट प्यानल पराजित भयो । काँग्रेस निकट लोकतान्त्रिक प्यानलले नेकपा निकट प्यानलाई पराजित गरेको थियो । निर्वाचित खुमबहादुर सुवेदीले ५२१ मत ल्याएका थिए । पराजित थापाले ४३८ मत प्राप्त गरेका थिए । पराजित थापा प्यानलका सरिता लामा भने महासचिवमा विजयी भएकी थिइन् ।

नेकपाका अर्का अध्यक्ष प्रचण्डको गृहजिल्ला चितवनमा केही समयअघि भएको नेपाल निर्माण व्यवसायी सङ्घको निर्वाचनमा नेकपा पराजित भयो । अध्यक्षमा काँग्रेस निकट उमानन्द कँडेल (बाबुराम) ले नेकपा निकट छवि गौतमलाई पराजित गरे । 

ठमेल पर्यटन विकास परिषद्को निर्वाचनमा पनि नेकपाको गठबन्धन पराजित भयो । २६ जेठ २०७६ मा भएको निर्वाचनमा काँग्रेसका उम्मेदवार प्रकाशनरसिंह राणाले नेकपाका उम्मेदवार अर्जुनलाल प्रधानलाई पराजित गरेका थिए ।