सपथ ग्रहणमै किन कुटाकुट गरे, नेकपाका नेता कार्यकर्ता? वास्तविकता यस्ताे छ

महाेत्तरी-घेराबन्दीमा परेको र पार्टीको पद्धतिअनुरूप काम गर्न नपाएको भन्दै केही दिनअघि प्रदेश अध्यक्ष प्रभु साहले पदबाट राजीनामा दिएका थिए । तर पार्टी सचिवालयले साहको राजीनामा स्वीकृत गरेन ।

स्रोतले दिएको जानकारीअनुसार वरिष्ठ नेता माधव नेपाल र पार्टीका नेता मातृका यादव मिलेर घेराबन्दी गरेको, कामै गर्न नदिएको उनको  आरोप थियो ।

विवादकै कारण जिल्ला कमिटीको शपथ ग्रहण पनि दुईपटक स्थगित भइसकेको छ । र, यो तेस्रोपटक डाकिएको थियो ।

मंगलबार शपथको तयारी भए पनि नेता नेपाल पक्ष र मातृका पक्षले दुई–चारदिनदेखि नै जिल्लामा भेला, बैठक गरेको र त्यसैले झडपको पृष्ठभूमि तयार गरेको साह पक्षको भनाइ छ ।

यता प्रदेश सचिव सुमनराज प्याकुरेलले भने सामान्य विवाद भएको बताए । “दुई ठूला पार्टी एकीकरणको प्रक्रियामा छन् । विवाद हुन्छ, मिल्छ । अहिले पनि भएको त्यही हो, यसलाई ठूलो नबनाऔँ,” उनले भने ।

उनले कुटाकुट नभएको र आफूविरुद्ध नाराबाजी भएको बताए । “विधानतः १६५ भन्दा बढी सदस्य राख्न पाइँदैन । माओवादीको चार हजारको त केन्द्रीय कमिटी नै थियो । तलका जिल्ला कमिटीको आकार पनि झण्डै तेत्रै छ । सबैलाई समेट्दा वडा तहसम्म पूर्वमाओवादी केन्द्रले नै पुग्छ । विवाद त हुने नै भयो,” उनले भने ।

बर्दिवास सेवा समितिको हलमा हुलहुज्जत हुन थालेपछि प्रहरी परिचालन गरिएको छ । उत्तेजित कार्यकर्ताहरूले प्रदेश नेतृत्वविरुद्ध नाराबाजी गरेको त्यहाँ रहेका सञ्चारकर्मीले जनाएका छन् ।